Preto de 600 persoas chegaron este domingo ás Canarias en sete embarcacións precarias

Case 600 persoas, entre elas mulleres e nenos, chegaron este domingo ás Canarias en seis caiucos e unha embarcación máis, tras o desembarco nas últimas horas doutras tres embarcacións con 153 persoas a bordo nas illas de El Hierro e Gran Canaria.

Arredor das 14:00 horas, Salvamento Marítimo recibiu información da Garda Civil sobre o avistamento dun caiuco a case 13 quilómetros da Restinga, en El Hierro. Mobilizaron a Guardamar Talía, que localizou a embarcación un cuarto de hora despois e procedeu a escoltala ata o porto, con 81 persoas de orixe subsahariana, entre as que se atopaban unha muller e un menor.

Dúas horas despois, a Garda Civil informou da localización por un radar dunha embarcación a 16 quilómetros de Maspalomas, na illa de Gran Canaria. Salvamento Marítimo mobilizou a Salvamar Nunki, sobre as 16:25 horas, que avistou un caiuco e rescatou as tres persoas que levaba a bordo. Neste caso, todos eran homes e desembarcaron sobre as 18:00 horas no peirao de Arguineguín.

Noutro caiuco que chegou á Restinga con 69 persoas, unha delas unha muller, explicaron á Garda Civil que viñan con outro caiuco aínda maior, pero que o perderan de vista porque lles fallou o motor ou quedaron sen combustible.

A chegada destas tres embarcacións tivo lugar despois de que un caiuco con 155 persoas a bordo, entre as que se atopaban 19 mulleres e 15 nenos, desembaracase ás 10:30 horas no porto de La Restinga. O caiuco chegou escoltado pola Garda Civil, a quen indicaron que levaban cinco días de navegación e que saíron de Nuakchot, a capital de Mauritania.

Entre os pasaxeiros dese caiuco, unha muller embarazada foi trasladada ao hospital, e había nacionais de Malí, Senegal, Guinea-Conakri, Mauritania, Gambia, Camerún e Costa de Marfil.

A maiores, na madrugada do domingo chegaron noutras tres embarcacións un total de 261 persoas. Polo menos dez delas requiriron ser trasladadas a centros sanitarios por diferentes patoloxías.

O balance de mortos ascende dende o venres a cinco persoas, dúas delas faleceron o venres e foron enterradas no cemiterio de El Pinar, na illa de El Hierro. As tres falecidas o sábado recibiron sepultura en Valverde, na mesma illa.

Debido á cantidade de migrantes que chegaron esta fin de semana a El Hierro, este domingo foron derivados a Tenerife un total de 300 persoas a bordo da patrulleira da Garda Civil e 61 persoas máis nun barco de liña regular.