Cinco detidos por explotar a traballadores estranxeiros en Mallorca
Cinco detidos por explotar a traballadores estranxeiros en Mallorca
Crearon unha empresa ficcticia que chegou a contar con máis de 185 traballadores ao longo dos máis de dous anos de existencia
Está considerada como a empresa con maior número de traballadores irregulares detectada na historia nas Baleares
A Policía calcula que a organización ingresaba uns 200.000 euros mensuais, ata xerar uns 6 millóns de euros nos dous anos e medios de actividade
A Policía Nacional detivo a cinco persoas pola súa presunta relación cunha organización criminal dedicada á explotación de traballadores en situación irregular a través dunha empresa en Mallorca, que chegou a ser a entidade con maior número de traballadores irregulares detectada na historia en Baleares.
Os presuntos autores están acusados dos delitos de pertenza a organización criminal, favorecemento da inmigración irregular, contra os dereitos dos traballadores, contra os dereitos dos cidadáns estranxeiros e falsidade documental, informou o corpo policial nunha nota.
A Brigada Provincial de Estranxeiría e Fronteiras da Policía Nacional en Baleares iniciou esta operación no verán. A suposta empresa contaba con máis dun cento de traballadores e chegou a ter máis de 185 traballadores ao longo dos máis de dous anos de existencia.
A organización criminal creara unha empresa ficticia, cunha imaxe de lexitimidade e todo tipo de folletos e publicidade da empresa, con táboas de servizos e custos.
Os sospeitosos ofertaban servizos de coidado a persoas dependentes, empregadas do fogar ou servizos de limpeza. Traballos que desempeñaban estranxeiros en situación irregular que debido á súa situación de vulnerabilidade prestábanse a desenvolver o traballo en condicións de explotación; traballaban máis de seis días á semana, sen respectarlles os períodos de descanso, sen ningún tipo de cobertura sanitaria ou seguro de accidentes, sen dereito a vacacións e a cambio dun salario moi inferior.
O principal encargado tiña ao seu nome un total de 25 contas bancarias en 13 bancos distintos e utilizaba entidades de transferencia de divisas para o movemento do diñeiro e pago de parte dos seus empregados, segundo informou a Policía Nacional.
Segundo a Policía, o cabeciña chegou a abrir contas bancarias con sede social nunha capital europea para eludir a acción da xustiza e a Axencia Tributaria en relación ao pago de impostos. Para abrir as contas bancarias, a organización utilizaba un locutorio de Palma e obrigaba ás traballadoras a que abrisen conta bancaria nas mesmas para evitar ser detectados polas autoridades.
A organización tería ingresando aproximadamente uns 200.000 euros mensuais, ata xerar uns 6 millóns de euros nos dous anos e medios de actividade. A Policía non descarta que se produzan novas detencións en relación con esta presunta trama.
