Feijóo pide que non eternice a lexislatura, e Sánchez responde que se lle vai facer un pouco longa
Feijóo pide que non eternice a lexislatura, e Sánchez responde que se lle vai facer un pouco longa
O presidente do Goberno felicita a Feijóo polos resultados das europeas, que lle permiten "continuar á fronte do PP facendo oposición un pouco máis"
O líder da oposición recrimínalle a Pedro Sánchez que "non ten apoios abondos nas urnas"
![A pregunta do líder da oposición ao presidente do Executivo abriu a sesión de control ao Goberno no Congreso este mércores (EFE / Fernando Alvarado).](https://img-g24-crtvg.flumotion.com/prog24/2024/20240612/SANCHEZFEIJOOSESIONCONTROL12XUNOEFEFERNANDOALVARADO.jpg)
O presidente do Gobierno Pedro Sánchez díxolle ao líder da oposición Alberto Núñez Feijóo que as eleccións xerais que pide se celebrarán en tres anos, en 2027, e que entón o PSOE gañará ás "tres ultradereitas", ao seu xuízo: o PP, Vox e Se Acabó La Fiesta de Luis Alvise Pérez.
Na primeira sesión de control ao Goberno tras as eleccións europeas, en que o PP gañou ao PSOE por 20 escanos fronte a 22, Feijóo pediu ao xefe do Executivo que non eternice o que é inviable, porque non ten apoio suficiente nas urnas, e que sexa responsable e pregunte aos españois.
Feijóo aludiu ademais á amnistía, cuxa aplicación "non será carne sen ósos", a que a vicepresidenta segunda "dimitiu un pouquiño" ou a que "outra persoa" do "vínculo máis íntimo do presidente volve estar investigada por corrupción", aludindo, sen nomealo, ao irmán do presidente.
Sánchez replicoulle que os resultados das europeas permitiron que os de Feijóo lle deixen "continuar á fronte do PP facendo oposición un pouco máis" e díxolle que "se lle vai a facer un pouco longo", cominándoo a eleccións dentro de tres anos.
Ademais, o xefe do Executivo culpou a Feijóo de que agora non haxa unha ultradereita, senón dúas, e acto seguido falou de tres, incluíndo o PP: "Cando haxa eleccións en 2027 vanse presentar tres ultradereitas, a súa, a de Alvise e a de Abascal; imos gañarlles ás tres, señoría, senón ao tempo".
Ademais, Sánchez deixou sen resposta unha pregunta de Feijóo: "Vai entregar a Generalitat a Puigdemont para que lle deixe gobernar máis?".