Prisión sen fianza para as dúas acusadas de asasinar unha moza en Valdeorras

As dúas mulleres detidas polo asasinato de Leticia Magali Sanabria agardarán polo xuízo no cárcere. O xuíz que lles tomou declaración ata as seis e media da tarde, decretou para elas prisión comunicada e sen fianza.

Ambas foron detidas o pasado martes en relación co crime. Á súa chegada aos xulgados, familiares e amigos da vítima recibíronas con insultos e berros. 

Entre os asistentes estaba a irmá da moza asasinada. Di que desconfiou delas dende o mesmo día do crime, cando acudiu á casa da súa irmá e as mulleres lle abriron a porta.

"Estaba pasando eu ao cuarto e ríronse de min. Dixeron que a policía estaba falando con ela. Eu senteime, tranquiliceime e elas falaban polo baixiño e facíanse sinais. Eu dixen: foron elas", di Alicia Sanabria.

O furgón policial sae do xulgado do Barco de Valdeorras. Ourense.

Leticia tiña 28 anos e era natural de Paraguai. O pasado 10 de setembro apareceu asfixiada na súa casa, no Barco de Valdeorras. 

Unha das arrestadas é compañeira de piso e a outra é unha amiga que a visitaba con frecuencia. Foron as propias detidas as que alertaran do crime e simularon que intentaran reanimar a vítima. A familia de Leticia pide que se faga xustiza. 

"Que paguen e que non saian nunca máis" di a irmá da vítima ás portas do xulgado.

Leticia era a maior de nove irmáns e traballaba aquí para axudar a familia. Polo de agora descoñécense os motivos do crime. A investigación está baixo segredo.