Problemas técnicos no AVE galego obrigan a utilizar o Avlo por terceira xornada seguida
Problemas técnicos no AVE galego obrigan a utilizar o Avlo por terceira xornada seguida
Algúns viaxeiros xa presentaron as primeiras reclamacións por pagar traxectos en Preferente e viaxar en low cost
Tren Avlo entre Madrid e Galicia
As reiteradas demoras nas viaxes no debut do AVE galego, non son as únicas deficiencias no servizo tras a serie de avarías dos últimos días que deixaron varios convois do AVE inutilizados de xeito temporal. O xoves, o venres e tamén este sábado, algunhas unidades de alta velocidade cos Avril S106 que unen Galicia con Madrid non puideron operar.
Renfe substituíunas pola versión de baixo custo, o Avlo, que tiña prevista a súa estrea anunciada para o próximo día 22.
A compañía admite que por terceira xornada consecutiva, os pasaxeiros con billete para os Avril tiveron que viaxar nalgúns dos horarios en material AVLO, con redución de prestacións no interior e menos comodidades.
Renfe alega que o cambio é "puntual" por "necesidades operativas da compañía" sen proporcionar máis datos.
O xoves o AVE Madrid Vigo foi o que non puido circular por avaría, o venres sucedeu o mesmo co Vigo-Madrid, e este sábado pasou o mesmo co que saíu de Madrid cara A Coruña e o regreso a última hora da tarde á estación Chamartín-Clara Campoamor.
A mesma sorte correu ao que saíu pola mañá desde Vigo. A operadora ferroviaria substituíu as unidades previstas polo Avlo, das mesmas características técnicas que o AVE con ancho variable, pero diferente no seu confort interior. Non conta con clase preferente e ten unha fila máis de asentos ao ancho, polo que son 74 prazas máis, carece de cafetería e oferta máquinas expendedoras.
Reclamacións de usuarios
Algúns dos usuarios deste tipo de trens xa presentaron as primeiras reclamacións polo cambio nas viaxes. Este tipo de remudas dun tren a outro non aparece nas condicións de posvenda de Renfe como motivo para recibir indemnización, ou recuperar parte do importe pagado.
Pero si que existen motivos que dan dereito a reclamar. A ausencia de aseos no tren durante o traxecto, se non funciona a climatización, a ausencia de cafetería, ou de servizo de restauración na composición prémium do AVE ou deficiencias na asignación de prazas dan dereito a esixir a devolución desde o 10 % ata o cen por cento do pagado.
Todas as indemnizacións se solicitarán mediante reclamación escrita polas canles habituais.
