Segue a busca do home de 82 anos desaparecido desde o domingo en Abadín
Segue a busca do home de 82 anos desaparecido desde o domingo en Abadín
O dispositivo volve transcorrer por lugares xa visitados por se houbese algún indicio
O home vivía só e o aviso saltou cando non se presentou para ir ao centro de día
Continúa a busca de Enrique Bolívar, un veciño de Abadín de 82 anos que falta do seu domicilio desde o domingo pasado. Aínda que xa rastrexaron os arredores volven facelo unha vez máis por se aparecese algún indicio sobre o seu paradoiro.
Búscao xente que vai a cabalo, a maioría faino a pé e outros en moto. No dispositivo participa voluntariado e tamén medios aéreos. Os ánimos van decaendo, pero non cesan de buscalo, tanto preto coma lonxe da casa.
Enrique Bolívar vivía só nunha vivenda de Quende e a última vez que o viron viña da casa dunha veciña, moi próxima á súa. Ao día seguinte xa non estaba cando o foron buscar do centro de día de Abadín. A familia non cesa a busca e agradece a participación da veciñanza.
