Puente admite que o Goberno considerou tomar o mando en Valencia ante o "desconcerto"

O ministro de Transportes e Mobilidade Sostible, Óscar Puente, admite que 48 horas despois da catástrofe da DINA o executivo considerou a posibilidade de tomar o mando ante o "desconcerto" percibido na Generalitat valenciana, pero ao final resolveu non facelo "ponderando os pros e contras".

Nunha entrevista que publica este domingo o xornal La Vanguardia, Puente considera que "tomar o mando inmediatamente pode ter un efecto cara á galería, moi positivo para nós, para o Goberno. Hai moita xente á que lle gustan os xestos manu militari".

Porén, ao final creron que "pasadas esas primeiras horas, ía ser contraproducente, porque a Administración que mellor coñece o territorio é a autonómica".

Para o ministro, "unha parte importante dos falecementos eran evitables", pero eludir os danos materiais resultaría máis difícil porque foi "unha DINA moi extrema, que afectou o 40 % do territorio da provincia de Valencia".

Na entrevista, Puente elude opinar sobre a xestión do presidente valenciano Carlos Mazón "por responsabilidade e eficacia", pero si se pronuncia sobre as acusacións do PP contra a vicepresidenta Teresa Ribera.

"As acusacións caen polo seu propio peso, tendo en conta a cantidade de información que desde a Aemet e a Confederación Hidrográfica do Júcar se puxo a disposición de quen tiña que tomar as decisións en materia de protección civil".

Na súa opinión, esas denuncias teñen moito de "estratexia política" e lamenta que "neste caso foron demasiado lonxe, porque están a trasladarlles ás institucións europeas as súas angustias políticas".

Aprobación dos orzamentos

No que respecta ás contas para o vindeiro ano, considera que "pretender que a reconstrución de Valencia non garda relación co escenario orzamentario é moi pueril e irresponsable".

"Non se pode estar a pedir a emerxencia nacional, como fai o PP, e ao mesmo tempo, negar unha relación desta situación coa aprobación orzamentaria", engade o ministro, que se mostra optimista ante a súa posible aprobación polos socios de investidura.

Puente asegura que os investimentos que requirirá o territorio valenciano non irán en detrimento das obras no corredor Mediterráneo, que se debe converter en "ferramenta de reconstrución" e "nun mecanismo de reactivación económica".

Estragos nunha casa afectada pola riada en Picanya (Valencia). EFE/Villar López

Mazón di que "non estaba incomunicado"

O presidente da Generalitat, Carlos Mazón, pediu que paren xa "as loiadas e mentiras" sobre a súa actuación na tarde do 29 de outubro, na que insistiu en que non estaba incomunicado e mesmo falou co alcalde de Cullera.

Segundo dixo antes de asistir á reunión do Centro de Coordinación Operativa Integrada (CECOPI), o Goberno "está a caer nunha contradición tras outra" a través "das súas entidades".

Preguntouse por que o Goberno "non tomou o mando" das emerxencias se tiña información, a través da Aemet, do risco de rotura da presa de Forata.

"Quéreme vostede dicir que o Goberno ás 17:30 xa sabía que podían correr perigo 80.000 vidas de valencianos e non toma o mando porque supostamente aquí no CECOPI, nun órgano do que forma parte o propio Goberno, están naufragando ou non están a saber tomar decisións?", insistiu.

O mandatario considera que o Executivo central debe responder e acúsao de caer "nunha contradición tras outra a través das súas entidades".

"Xa está ben de enganar a xente, porque o que pasou é moi grave como para estar a cambiar de relato coa UME si ou coa UME non, ou se o presidente estaba incomunicado".

Insiste en que "non estivo incomunicado" durante cinco horas o día da DINA, que falou co alcalde de Cullera ás 18:28 horas para preguntarlle como estaba a situación e con outros máis.

"É unha das maiores loiadas de todo este tempo", dixo.

O presidente da Generalitat sinalou que se está a facer un esforzo pola recuperación e, con "todo o que está a pasar, con esta dor tan tremenda", é "esgotador estar a desmentir embustes permanentemente".

"O CECOPI constituíuse ás 17:00 horas e eu ás 17:30 xa estaba a recibir e atender chamadas da conselleira, do presidente da Deputación...".

A súa presenza no CECOPI "non é necesaria!

Os únicos problemas de comunicación, apuntou, producíronse ao chegar á reunión do CECOPI porque caeran as liñas de telefonía.

Así mesmo, argumentou que mantivo o seu plan do día porque "todo o mundo estaba preparado" e validamente constituído un órgano do que el, reiterou, non forma parte.

A presenza institucional do presidente valenciano "non é necesaria" para tomar as decisións que validamente se estaban tomando e non foi ata as oito da tarde cando se confirmou a posibilidade inminente de que a presa de Forata puidese desbordar.

Tamén citou a UME para dicir que é capaz "de dicir á vez que sen a autorización da Generalitat non podía activarse, non podía facer nada e, uns días despois, que antes da súa autorización xa estaba a operar, xa estaba a traballar. En que quedamos?".

Mazón tamén acusou de contradición á secretaria xeral do PSPV-PSOE e ministra de Ciencia, Diana Morant.

"Pasa de dicir que nos vai apoiar os orzamentos a pedir a miña dimisión".

Neste sentido, preguntouse se non será que a situación da vicepresidenta e ministra de Transición Ecolóxica, Teresa Ribeira, cambiou e agora "todo é un argumento e un cálculo político para tratar de reverter esa situación de Teresa Ribeira ou do Ministerio".