Puigdemont protagoniza unha nova fuxida sete anos despois

Carles Puigdemont fuxía por primeira vez de España en outubro de 2017. Sete anos despois, tras un breve paso por Barcelona, volve estar en paradoiro descoñecido. 

O 27 de outubro do 2017, o Parlament catalán aprobaba a declaración unilateral de independencia. A resposta do Goberno de Rajoy foi a aplicación do artigo 155. 

Puigdemont foxe de España no maleteiro dun coche. Estableceuse en Waterloo e alí comezou un exilio voluntario. Sete anos nos que pasou dúas veces por prisión, en Alemaña, en marzo do 2018, e en  Italia, en setembro do 2021. E as dúas veces quedou en liberdade. Dende Waterloo viu como os seus compañeiros de Goberno entraban e saian da cadea. No exilio liderou tres candidaturas de Junts. Foi elixido eurodeputado. E na campaña das últimas, as do pasado 12 de maio, anunciou que volvería a España e se non era elixido president, deixaria a política.

Antes, chegou a un acordo co PSOE para apoiar a investidura de Pedro Sánchez, e a lei de amnistía foi unha realidade. Pero o Supremo rexeitou amnistiar o delito de malversación e mantén a orde de detención de Puigdemont. Onte anunciou que volvía a España. Hoxe, chegou, falou e fuxiu.