Reflotado o pesqueiro que se afundiu no porto de Ribeira

Unha empresa especializada en traballos portuarios, contratada pola armadora, conseguía sacar a flote o pesqueiro que se afundía esta mañá no porto de Ribeira, despois dunha hora de traballo. 

Mentres, efectivos de Salvamento Marítimo e de Gardacostas despregaban barreiras anticontaminación para controlar a vertedura de aceites e combustible do barco.

"Tivemos bastante sorte porque as condicións metereolóxicas axudaron a que o vento e as correntes mantivesen o hidrocarburo na lámina do porto"., di o xefe de servizo de Gardacostas de Galicia.

O pesqueiro 'Illas Cíes', de 10 metros de eslora, afundiuse este sábado pola mañá cando estaba atracado en Ribeira, o seu porto base. O naufraxio non causou vítimas, xa que a bordo do barco non había ninguén. A radiobaliza saltou ás sete da mañá sen que, de momento, se coñezan as causas do sinistro.

"Hai moitas circunstancias: un pequeno obxecto que se mete nunha bomba, un macho de fondo que quedou aberto ou que se furou e vai entrando auga, ou polo vento mesmo que batera contra o peirao ou contra unha escaleira", di o Patrón maior de Ribeira, Xosé Antonio Pérez Sieira.

Segundo o alcalde,  Luís Pérez Barral, "Estase mirando se pode ser que un macho de fondo rompera e inundara o barco, pero tamén nos dicían que atoparan a porta un pouco aberta, as luces acendidas. E iso fai pensar mal".