Regresan os bombeiros galegos que axudaron nos incendios de Chile

Pablo e Alberto descansan uns días logo de pasar dúas semanas combatendo os lumes forestais de Chile. Estiveron en diferentes zonas do país suramericano onde a seca prolongada fixo que os incendios se estean a volver incontrolables. Puideron así coñecer novos métodos de traballo en hábitats diferentes do seu medio habitual e intercambiar técnicas con outros bombeiros.

Estes bombeiros da BRIF de Laza viviron situacións moi duras debido á intensidade dos lumes, que deixaron 30 persoas mortas, mil feridas e 800 vivendas arrasadas. Mesmo un dos seus compañeiros perdeu a vida nos labores de extinción. No positivo quédalles o feito de que puideron axudar e o agradecemento das persoas que auxiliaron.

Aínda que acaban de regresar, Pablo e Alberto din que non lles importaría volver partir para axudar onde sexa preciso.