Remata a investigación das gravacións da Maruxaina cun sospeitoso
Remata a investigación das gravacións da Maruxaina cun sospeitoso
O auto sinala que os feitos do 2019 poderían ser constitutivos dun delito de produción, distribución e tenza de material pornográfico
As partes teñen 10 días para pedir a apertura de xuízo ou solicitar novas probas
![Carlos Castro/Europa Press. Arquivo](https://img-g24-crtvg.flumotion.com/prog24/2024/20240625/maruxaina_protesta.jpg)
A titular do Xulgado de Instrución número 1 de Viveiro concluíu a investigación sobre as gravacións a mulleres ouriñando na rúa durante as festas da Maruxaina, en Cervo, que foron subidas a páxinas web pornográficas.
Os feitos, correspondentes ao ano 2019, poderían ser constitutivos dun delito de produción, distribución e tenencia de material pornográfico.
A xuíza ordenou que se continúe cos trámites do procedemento abreviado fronte a un único sospeitoso e trasladou as actuacións á Fiscalía e ás acusacións particulares para que no prazo de 10 días soliciten a apertura de xuízo oral cos seus correspondentes escritos de acusación, pidan o arquivo da causa ou, mesmo, a práctica de dilixencias complementarias.
O caso Maruxaina remóntase ás festas do ano 2019. Daquela, algunhas das vítimas atoparon vídeos seus nunha páxina web de pornografía de pago nas que se lles podía recoñecer ouriñando na rúa.
As afectadas foron presentando denuncias e en marzo de 2021, o Xulgado de Instrución número 1 de Viveiro arquivou o caso ao considerar que as gravacións "non constituían un delito por ser realizadas nun lugar público no que podían ser vistas por calquera".
A decisión creou un gran malestar na rúa e levou á convocatoria de mobilizacións sociais.
Tempo despois, a Audiencia Provincial de Lugo reabriu o caso xa que consideraba "comprometida" a intimidade das vítimas.
Practicáronse entón as dilixencias pedidas por Fiscalía e acusación e entre 2022 e 2023 volveu tomar declaración a moitas das afectadas. O pasado mes de marzo, a Policía Xudicial acordaba investigar a entre cinco e seis persoas identificadas por un informe pericial informático que encargou a asociación Mulleres en Igualdade de Burela.