Remata a noite de festa ferido no hospital e o coche que lle prestaron esnafrado nun piñeiro
Remata a noite de festa ferido no hospital e o coche que lle prestaron esnafrado nun piñeiro
Perdeu o control do coche cando baixaba de Paraíso, no concello de Portas
Un piñeiro ao lado do camiño que baixa de Paraíso é onde foi parar o coche que un veciño dese lugar do concello de Portas lle prestou ao curmán tras unha noite de festa para que regresara á súa casa.
Eran case as nove da mañá deste domingo e no coche ía só o chofer. Tras saír dunha curva foi pola marxe dereita por un desnivel ata bater lateralmente contra a árbore.
Ao lugar do sinistro acudiron unha dotación de bombeiros que non chegaron a intervir, efectivos de urxencias médicas e de Protección Civil de Cuntis e de Portas, ademais dunha patrulla da Garda Civil de Tráfico.
O condutor, duns trinta anos, foi evacuado ao hospital do Salnés. No sitio do sinistro tamén se presentou o dono do coche que puido comprobar a desfeita en que acabou a noite de troula: o curmán na ambulancia con feridas, ao parecer, nunha perna e o coche estragado.
