Un grupo de candorcas deixa sen temón un veleiro preto do Roncudo

O Centro de Salvamento Marítimo de Fisterra mobilizou a Salvamar Altair e o Helimer 402 para remolcar un veleiro con dous tripulantes tras unha interacción con candorcas a 6,5 millas do Roncudo.

Salvamento Marítimo informou este luns de que o veleiro Amidala pediu asistencia por interacción con candorcas ás 15:39 horas do domingo. Os dous tripulantes da embarcación, de nacionalidade belga, alertaron de danos no temón, polo que non tiñan capacidade de manobra.

As condicións meteorolóxicas na zona eran adversas e durante a manobra de remolque, unha das tripulantes quedou ferida de gravidade nunha man, polo que foi evacuada en helicóptero xa que a chegada a Camariñas por mar poderíase demorar unhas catro horas.

A Salvamar Altair deixou o veleiro atracado en Camariñas ás 21:20 horas. 

Dana e Wim están ben, pero aínda teñen o susto no corpo. "Foi de repente, saíron do máis profundo do mar e deron directamente co radar e o temón, foron golpes fortes, estiveron como uns tres minutos ata que o barco quedou completamente bloqueado", explica Wim.

"Estaba collendo a liña de rescate fronte a eles, e a man quedoume atrapada entre o barco e a liña. Fixo crac e comezou a sangrar moito", recorda Dana.

"Tentaremos navegar de volta á casa, arranxalo ben e preparalo para o noso obxectivo de dar a volta ao mundo" engade Wim, que mercou o barco hai tan só un mes en Grecia.

Nos últimos días houbo máis avistamentos e interaccións con candorcas na zona. Se se cruzan con elas o primeiro é manter a calma, tal e como fixeron estes mariñeiros, cuxa profesionalidade axudou ao feliz desenlace.