Renfe pon en circulación dous novos servizos Avlo no corredor Galicia-Madrid

Renfe pon en circulación a partir deste venres, 24 de xaneiro, dous servizos Avlo con trens S106 en substitución de dous servizos Alvia na conexión entre Vigo e Madrid.

A posta en marcha destes dous Avlo S106, sinala este xoves un comunicado da operadora, supón unha "nova mellora na oferta comercial de Renfe, con trens con máis do dobre de prazas que os Alvia e con mellores prestacións". Tamén significa, engade a nota, que máis viaxeiros teñan posibilidade de acceder a este servizo de baixo custo da compañía que prestará parada en todas das estacións de alta velocidade do percorrido.

Unha vez finalizada a campaña do Nadal, e tras poñer en circulación dous Avlo diarios entre Vigo e Madrid e outros dous entre A Coruña e Chamartín, o Avlo que en días alternos comunica Madrid con Vigo e A Coruña deixará de prestar servizo para adaptar a oferta á demanda en época invernal.

Os dous novos servizos Avlo con S106 substituirán estes dous Alvia: Alvia Madrid-Vigo, que se substitúe por un servizo Avlo S106 diario con saída da capital ás 17:08h (antes ás 16:00 h) e chegada a Vigo ás 21:37 h, con parada en todas as estacións intermedias.

E Alvia Vigo-Madrid, que se substitúe por un servizo Avlo S106 diario con saída de Vigo ás 5:59 h (antes ás 6:45 h) e chegada a Madrid ás 10:34 h, con parada en todas as estacións intermedias.

Os billetes xa poden adquirirse na web e a App de Renfe, tamén en axencias de viaxe presenciais e virtuais, despachos de billetes das estacións, máquinas autovenda e venda telefónica no 912 320 320.