Renfe prevé que os Avril comecen a operar en Galicia "como tarde" o 21 de maio

O operador ferroviario Renfe prevé que os trens Avril comecen a operar na liña Madrid-Galicia "como tarde" o 21 de maio, polo que a partir do próximo 18 de abril empezará a venda de billetes con estes convois.

Así o confirmaron fontes do Ministerio de Transportes, Moiblidade e Axenda Urbana consultadas por Europa Press, que non descartaron poder iniciar os servizos mesmo antes desa data.

En concreto, espérase comezar a recibir as primeiras unidades dos trens Avril de Talgo a finais da semana que vén de forma gradual ata o 22 de abril.

As mesmas fontes lembraron que o uso destas mecánicas permitirá máis que duplicar a oferta de prazas, ata superar os 11 millóns, e reducir os tempos de viaxe entre Madrid e Galicia.

Isto debido a que son trens de rodadura desprazable, que lles permite circular por distintos anchos de vía a alta velocidade, permitindo a chegada do AVE a cidades como Vigo, Santiago e A Coruña.

Así, de Madrid á Coruña, a mellora nos tempos de viaxe será de 26 minutos, quedando en 3 horas e 22 minutos. A Vigo, o traxecto desde a capital aforrará 37 minutos respecto á actualidade, con 3 horas e 35 minutos.

A Pontevedra, a viaxe durará 3 horas e 20 minutos, 40 minutos menos. De Madrid a Santiago ao tren levaralle 2 horas e 50 minutos, 29 menos que ata o de agora.

Todo iso despois de innumerables cambios nas previsións de chegada dos Avril a Galicia, que foron prometidos para o verán de 2022. Con todo, esta data foise alongando no tempo, fixándose para finais de 2023 e despois para o primeiro trimestre de 2024. En xaneiro, en plena precampaña electoral, o ministro de Transportes, Óscar Puente, dixo que entrarían en funcionamento en marzo, data que non se cumpriu. Agora, Renfe prevé que operen como tarde o 21 de maio.