Rescatan 600 migrantes en augas do Mediterráneo, nun dos maiores salvamentos do ano

O buque de Médicos sen Fronteiras (MSF), o Geo Barents, rescatou 599 migrantes que ían amoreados nun barco de madeira á deriva no Mediterráneo central nunha operación coordinada polas autoridades italianas, que autorizaron o seu desembarco en Bari, na rexión de Apulia, no sur do país.

"Mentres o noso equipo realizaba actividades de formación fronte ás costas de Sicilia, o Centro de Coordinación de Salvamento Marítimo de Italia púxose en contacto co Geo Barents para axudar a un barco en perigo con 599 persoas a bordo", informou a ONG nas súas redes sociais.

MSF informou de que as operacións duraron tres horas debido ao gran número de persoas e que "os 599 sobreviventes, incluídos mulleres e nenos, agora están a salvo a bordo e están a ser atendidos polo equipo médico".

"O desembarque realizarase en Bari, o porto que foi asignado polas autoridades italianas", comunicou MSF, que lamentou que se atopa a unhas 40 horas de navegación.

Por outra banda, os 500 migrantes que durante varios días estiveron á valga no Mediterráneo central e aos que se lles perdeu o rastro foron devoltos a Libia, segundo informou o voceiro para o Mediterráneo do Organismo das Nacións Unidas para a Migración (OIM), Flavio dei Giacomo.

O barco de rescate Life Support da ONG italiana Emergency levaba dous días buscando a barcaza que se atopaba na zona de procura e salvamento de Malta, polo que tamén determinou que con seguridade "estas persoas foron levadas de volta a Libia, aínda que as autoridades libias negárono ata o de agora".

No momento no que foron localizados, o día 23, a embarcación levaba 500 persoas a bordo, entre elas 56 nenos, incluído un bebé que nacera no barco, e 45 mulleres, entre elas varias embarazadas.

O bo tempo fixo que volvan producirse as saídas desde as costas do norte de África con destino a Italia e a Garda Costeira informou do rescate nos últimos tres días de máis de 1.200 migrantes.