Ribera, "decepcionada" coas ideas de Bruxelas para o gas: "Quedan curtas"

A vicepresidenta terceira do Goberno, Teresa Ribera, asegurou este venres estar "decepcionada" coas proposta que a Comisión Europea puxo sobre a mesa para intervir o mercado do gas.

Cre a vicepresidente que "quedan curtas con respecto ao que Europa necesita". Así o asegurou a tamén titular de Transición Ecolóxica en declaracións á prensa antes de participar na reunión extraordinaria dos ministros de Enerxía.

A cita ten o obxectivo de acordar un regulamento con tres medidas de emerxencia (aforro de electricidade, tope ás renovables e a nuclear e imposto solidario), pero os Vinte e sete tamén debaterán como intervir o mercado do gas, un asunto que xera división entre as capitais.

Quince estados membros, entre eles España, pediron nunha carta limitar o prezo de todas as importacións de gas, non só as rusas. Non obstante, Bruxelas advirte nun documento dos perigos que provocaría esa decisión, e pensa non se pode tratar igual que a Rusia países como Alxeria ou Noruega.

Ribera entende esa postura, e ata se amosou de acordo, pero cre que "tampouco é razoable mirar para outro lado cando hai moitas operacións que se están pechando a prezos que non teñen nada que ver nin cos custos de produción nin cos prezos que se pagan ao provedor".

A vicepresidenta terceira recoñeceu que se trata dun tema "sensible" no que os Vinte e sete non conseguen polo momento atopar un punto común, polo que descartou que a reunión deste venres finalice en principio cunha "conclusión definitiva" sobre a maneira de intervir o mercado do gas.

No que si ten máis confianza é en lograr consenso nunha "orientación moi clara" sobre que facer co índice de referencia do gas que se utiliza en Europa, o TTF Dutch de Países Baixos, que "xa non está a responder ao custo das operacións e o custo detrás de compra no mercado do gas".

Doutra banda, Ribera, que insistiu en tomar decisións conxuntamente e non a nivel individual, mostrouse comprensiva coa situación de Alemaña, que anunciou que destinará 200.000 millóns de euros de axudas para compensar a carestía do gas, pero sinalou que agora a Comisión terá que analizalo para garantir que non cre alteracións no mercado.

A vicepresidenta deu por feito que os Vinte e sete acordarán o regulamento con medidas temporais e urxentes para aforrar un 10 % de consumo eléctrico, gravar os beneficios extraordinarios das petroleiras, poñer un máximo de retribución á xeración eléctrica con nuclear, renovables e lignito, permitindo a España preservar as medidas similares que xa aplica desde hai un ano.