Rifan un carro de produtos de Entroido valorado en máis de dous mil euros

No adro da igrexa da Milagrosa de Carballo había un gran salgueiro chorón. Cando o quitaron para poñer a fonte que hai agora, os veciños lamentaron a perda da súa sombra e da súa estampa, que xa tiñan por un emblema do barrio. Por iso no entroido do 2023 decidiron replantar un novo chorón no parque do Forum e darlle tamén vida como símbolo do seu Entroido. A proposta callou e este ano vanlle celebrar o aniversario. 

"Como o cura cortou o chorón xurdiu a idea e dixemos imos facer o Renacemento do Chorón; mercamos un pequeno, plantámolo e así empezou a festa".

Para poder facerse co lote hai que estar presente no sorteo

Para financiar a Festa do Chorón, a comisión organizou a rifa dun lote de produtos de Entroido cedidos polos comercios do barrio. Pero a colaboración está superando con moito as súas expectativas, ata o punto de que decidiron facer un carro para meter todo. E aínda así xa se lles queda pequeno porque recalca Jesús Puente, o presidente da Asociación Cultural e Deportiva A Milagrosa, que hai que contar cos produtos frescos que engadirán a última hora, como a verdura, o pan ou os doces.

"O ano pasado collemos unha carretilla, pero quedounos curta e fixemos o carro".

Este é un dos reclamos cos que na Milagrosa queren potenciar o seu peculiar Entroido de inspiración vexetal a que cada vez se suman máis veciños facendo disfraces con follas, di Patricia Liñares, unha das organizadoras da festa. 

Cada quen pode ir como queira. O importante, din, é participar na festa que durará todo o día, pero que ten dous momentos relevantes: a procesión do chorón ás seis da tarde e o sorteo do carro de produtos, xa pola noite, entre todos os presentes que mercaran unha rifa.