Risco alto por inundación no río Miño ao seu paso pola Peroxa en Ourense
Risco alto por inundación no río Miño ao seu paso pola Peroxa en Ourense
E moi pendentes do efecto de desaugar as presas no curso do Miño
Vixíanse unha decena de ríos nas provincias de Lugo e Ourense con risco de rebordar
A Confederación Hidrográfica do Miño-Sil considera que, ao deixar de chover, a situación normalizarase durante a fin de semana. Pero de momento segue activo o Plan de inundacións no Támega, no Arnoia e no Miño, tanto na capital ourensá coma na Peroxa.
O río Miño ao seu paso pola cidade de Ourense vai con moito caudal e o encoro de Velle desauga máis de 2.000 metros cúbicos de auga por segundo. Circula por fóra do seu leito a unha altura de sete metros anegando todo o que está nas beiras. Non se ve nin a zona termal, nin as piscinas nin o paseo. Está en alerta pero ao remitir a chuvia non se prevé que vaia a máis.
Con todo, a situación "non é preocupante" porque na zona as casas están en puntos elevados e existe "moito espazo" ata o curso do Miño, segundo o alcalde da Peroxa, Manuel Seoane.
Outros ríos da provincia de Ourense circulan fóra do seu leito
É o caso do Arnoia na localidade homónima en Baños de Molgas, onde segue entrando a auga na parte baixa do balneario e no aparcadoiro do hotel. Hai cortadas varias estradas secundarias que dan acceso a algunhas aldeas e coa prohibición vixente de achegarse ao río por precaución.
Aínda así a tendencia é a que recuperen a normalidade coma no Támega na comarca de Monterrei. Alí tamén foi preciso cortar algunha estrada secundaria que discorre a carón do río e que tamén deixou incomunicadas algunhas aldeas.
O río Sil ao seu paso polo Barco de Valdeorras tamén vai con moita forza e desbordado nalgúns puntos, igual que o Avia en Ribadavia. A situación está mellorando pouco a pouco porque nas últimas horas remitiron as chuvias.
Situación dos ríos na Coruña e Lugo
O río Mandeo ao seu paso por Coirós tamén baixa cheo e con moita forza. Onte á noite rebordou e anegou a área recreativa de Chelo. Agora, ao parar de chover o caudal tende a baixar, pero aínda vai ao límite do leito.
Tamén se vixía cerca de aquí, en Betanzos, onde preocupa ademais o río Mendo, e nas Pontes o río Eume ao seu paso pola vila. A auga entrou nas vivendas e por momentos temeuse que pasara por enriba da ponte.
Na Mariña de Lugo están en alerta varios ríos. O Landro segue moi cheo aínda que xa lle baixou o caudal. Os veciños de Landrove empezan a respirar tranquilos, despois de que a auga lles entrara nas casas.
Na cidade de Lugo baixou algo o caudal do Miño, pero aínda tardará en volver ao seu leito. O colexio da Ponte, que se anegara hai dous días, puido abrir, pero a auga causou estragos nas caldeiras e na instalación eléctrica e non se puido dar clase.
Tamén intentan recuperar a normalidade na Terra Chá, onde segue habendo moita auga encorada. Mentres en Cospeito, a lagoa rebordou pola cantidade de chuvia que caeu nos últimos días, e hai aldeas ás que aínda agora é difícil acceder.
