Rueda considera o cambio na Xunta como "primeiras liñas" do novo Goberno en España

O presidente da Xunta, Alfonso Rueda, considerou que cos cambios no seu Executivo, por dous conselleiros que se marchan para ir nas listas do PP para o 23X, están a escribirse "as primeiras liñas" dun Goberno central que atenda mellor os intereses de Galicia.

Durante a toma de posesión dos novos conselleiros e conselleiras do Goberno galego, instou ás institucións españolas, en xeral, a "imitar" ás galegas porque así "serían mellores" e comprometeu, por parte da Xunta, "estar á altura" do que esixe a cidadanía.

Os once membros do Executivo galego combinan "traxectoria e experiencia co impulso necesario para afrontar os novos retos", asegurou, e son un equipo "cun proxecto común" que é o interese común de Galicia, á parte de "servir a Galicia e a España".

Neste acto, no Pazo de Raxoi en Santiago de Compostela, tomaron posesión dos seus cargos a nova conselleira de Promoción do Emprego e Igualdade, Elena Rivo; e o de Mar, Alfonso Villares, que se incorporan ao Goberno autonómico.

Pero tamén xuraron ou prometeron outros integrantes do Executivo que cambian algunha das súas carteiras. Son o novo vicepresidente primeiro e conselleiro de Presidencia, Diego Calvo; a vicepresidenta segunda e conselleira de Medio Ambiente, *Ánxeles Vazquez; e a conselleira de Economía, Industria e Innovación, María Jesús Lorenzana.

Para todos eles tivo Rueda palabras de agradecemento, así como para os dous que se van, o xa exvicepresidente primeiro Francisco Conde, e a exconselleira do Mar Rosa Quintana, dos que dixo que Galicia "non perde dous conselleiros, senón que gaña dous defensores en Madrid".

E a pesar destas despedidas, dixo que se segue conservando a "columna vertebral" dun Goberno que funciona e que, ademais, refórzase, coas incorporacións de Rivo e Villares.

Tamén destacou que Ánxeles Vázquez é a "primeira muller na historia de Galicia" que asume unha vicepresidencia da Xunta, algo que "xa era hora" que pasase e para o que é "a persoa idónea".

Os novos conselleiros comprometéronse a continuar o labor dos seus predecesores e a traballar para conseguir "unha Galicia mellor", segundo manifestou a nova titular de Promoción de Emprego e Igualdade, Elena Rivo, quen resaltou a importancia para a sociedade tanto do traballo como a igualdade "non só de xénero, senón a nivel social e no ámbito da diversidade intelectual".

Alfonso Villares, novo conselleiro do Mar, prometeu, na mesma liña, "esforzo, compromiso e humildade" así como "non dar nin un paso atrás nin en Madrid, nin en Bruxelas" en defensa do sector, e "dialogar ata quedar afónico" para chegar a consensos no seu ámbito.

"Agora toca seguir adiante, temos que seguir servindo a Galicia. Marcho moi emocionado, pero moi agradecido", dixo Conde, pola súa banda, ao despedirse neste acto.

 

Do mesmo xeito que Quintana, expresou o seu agradecemento a Rueda e ao líder do PP e expresidente da Xunta Alberto Núñez Feijóo, pola confianza que lle outorgou "unha vez máis" nesta ocasión para ir de número uno na lista por Lugo ao Congreso, e completou o seu discurso cun recoñecemento pormenorizado aos membros do seu equipo.

"Non vou chorar", asegurou Quintana nada máis iniciar a súa intervención, na que estivo visiblemente emocionada e considerou que se vai "cos deberes feitos", á parte de desexar "ao novo capitán que o buque teñan unha singradura tranquila e cheguen todos a bo porto".