Rueda reivindica o sector naval galego no 50 aniversario de Rodman Polyships en Moaña

O estaleiro vigués Rodman Polyships cumpre medio século de vida anunciando novos modelos de patrulleiras de 50 metros de eslora. Na celebración do aniversario este mércores nas instalacións que a empresa ten en Moaña o presidente da Xunta, Alfonso Rueda, anunciou un plan director para apoiar o sector naval.

Rueda reivindicou a importancia do sector naval galego, considerado "estratéxico", así como a necesidade de formación especializada para superar os retos desta industria.

Así o trasladou no acto de celebración do 50 aniversario do estaleiro. Nel participaron tamén os conselleiros de Economía e Industria, e de Emprego, Comercio e Emigración, María Jesús Lorenzana e José González; así como o delegado do Goberno en Galicia, Pedro Blanco, e outras autoridades.

Durante a súa intervención, o presidente da Xunta lembrou que Rodman Polyships é "unha empresa fundamental" para o tecido socioeconómico galego, a máis antiga de España no seu sector, e "axuda a difundir a imaxe de Galicia e dos seus traballadores por todo o mundo".

Rueda recalcou que este sector é estratéxico para a economía da comunidade e proximamente contará cun plan director, ademais de contar coa axuda e a "estabilidade" dun marco xurídico en Galicia. Así, en cifras, o sector supón o 3,5 % do PIB galego e emprega 14.000 persoas de forma directa, ademais das que traballan na cadea de valor e loxística vinculada a esta industria.

Por outra banda, fixo fincapé na "crecente necesidade" de contar con persoal especilizado, e apuntou que o Goberno autonómico traballa para impulsar a formación e o talento neste campo, adaptándoos ás demandas do mercado laboral, con microformacións e accións para cubrir as vacantes nas empresas.

Compromiso coa sostibilidade e a innovación

Rodman Polyships é a empresa máis antiga de España na fabricación de embarcacións de poliéster reforzado con fibra de vidro. Con tres estaleiros na ría de Vigo, o grupo cumpre 50 anos como referente na construción naval europea coa ollada posta en novos proxectos.

O presidente do Grupo Rodman, Manuel Rodríguez, reafirmou o compromiso da empresa coa calidade, a sostibilidade e a innovación tecnolóxica, e destacou os novos proxectos en marcha, entre os que destaca o desenvolvemento de embarcacións con sistemas de propulsión híbridos e eléctricos, novos modelos de patrulleiras de ata 50 metros de eslora con heliporto, ou o deseño de iates e megaiates de última xeración.

"Este aniversario marca un fito na nosa historia e reafirma o noso compromiso de seguir construíndo embarcacións que conxugan innovación, calidade e respecto polo medio ambiente, coa mirada posta nun futuro sostible e competitivo na industria naval. Traballamos, ademais, na dixitalización dos procesos de deseño e produción e na investigación en materiais avanzados para mellorar o rendemento e a durabilidade das embarcacións", destacou.

Pola súa banda, o delegado do Goberno en Galicia, Pedro Blanco, puxo en valor o compromiso do Goberno de España coa construción naval, e lembrou que, no marco do Plan de Recuperación, mobilizaranse 1.400 millóns de euros entre investimento público e privado para o sector naval de todo o país.

Igualmente, apuntou que 8 empresas da provincia de Pontevedra beneficiáronse da primeira convocatoria do PERTE Naval e, en 2025, resolverase a segunda, na que Galicia "está moi ben posicionada".

50 anos de historia

Rodman Polyships naceu nun pequeno taller de Vigo e converteuse na empresa do sector máis antiga de España e nun referente no sector naval. Con máis de 2.000 colaboradores e tres centros produtivos na ría de Vigo, fabricou máis de 15.000 embarcacións, desde patrulleiras ata iates de luxo, pasando por buques offshore.

A compañía consolidouse como líder na fabricación de embarcacións de poliéster reforzado con fibra de vidro (PRFV) e deu resposta ás esixencias de seguridade e durabilidade dos seus clientes en máis de 65 países. Entre eles, destacan a Armada Española, o Servizo de Vixilancia Aduaneira, o Servizo Marítimo da Garda Civil, Pescanova, a Xunta de Galicia e gobernos como Portugal, Bélxica, Sudáfrica, Mozambique, Angola, Arabia Saudita ou Omán, entre outros.