Sae en liberdade o líder de Amencer Dourado
Sae en liberdade o líder de Amencer Dourado
Nikos Mihaloliakos, de 66 anos, fora condenado en 2020, xunto con outros membros da cúpula do partido neonazi, a 13 anos de prisión por dirixir unha banda criminal
![Arresto do líder de Amencer Dourado Nikos Mihaloliakos en outubro de 2020 (Reuters).](https://img-g24-crtvg.flumotion.com/prog24/2024/20240503/DETENCIONLIDERAMENCERDOURADO2020REUTERS.jpg)
O líder e fundador do partido neonazi grego Amencer Dourado Nikos Mihaloliakos foi posto en liberdade condicionada, informou este xoves a televisión estatal helena ERT.
De 66 anos, Mihaloliakos fora condenado en 2020, xunto a outros membros da cúpula do seu partido, a 13 anos de cárcere por dirixir unha banda criminal.
Un tribunal ditaminou entón que varios crimes cometidos por membros de Amencer Dourado foran realizados baixo o amparo e ordes do partido neonazi, que en 2012, en medio da gran crise financeira do país, chegou a ser a terceira forza política grega, con 18 escanos parlamentarios.
Os xuíces aceptaron a súa petición de saír baixo fianza por bo comportamento e problemas de saúde
Agora os xuíces decidiron, en contra da postura da Fiscalía, acceder á solicitude de Mihaloliakos de ser posto en liberdade baixo fianza, tendo en conta o seu bo comportamento no cárcere e tamén problemas de saúde do reo.
Segundo unha fonte policial citada pola emisora pública, nos últimos meses Mihaloliakos tivo que ser atendido nun hospital e volvera a prisión tras o tratamento médico.
Desde o mércores atópase na súa casa ateniense, indicou a fonte.
A Fiscalía non está de acordo coa excarceración e presentou un recurso
O caso que levou ao seu encarceramento desatouse en 2013 co asasinato do músico e rapeiro Pavlos Fyssas por un simpatizante de Amencer Dourado.
Para a familia Fyssas, a liberación de Mihaloliakos: "Constitúe un insulto máximo ás vítimas de Amencer Dourado e ás súas familias e a toda a sociedade grega", segundo declararon os avogados da familia nun comunicado publicado por ERT.
Segundo a radio Atenas 9.84, a Fiscalía presentou xa un recurso contra a excarceración do líder neonazi, cuxo partido quedou fóra do Parlamento nas eleccións de 2019.