San Pedro da Ramallosa enche os seus postes de arte para combater o feísmo
San Pedro da Ramallosa enche os seus postes de arte para combater o feísmo
O artista Juan Rivas emprega como lenzo elementos que noutras circustancias afearían a paisaxe
Nos últimos días foron aparecendo obras de arte en distintos puntos de San Pedro da Ramallosa en Nigrán. Estas non tardaron en facerse virais nas redes sociais.
O obxectivo desta exposición ao aire libre, encargada polo Concello, non era outro que poñer en valor esta zona rural de Nigrán.
O alcalde de Nigrán, Juan González, di entre gargalladas que a xente pregunta se Bansky pasou por aí, pero o autor da obra non é outro que o Pontevedrés Juan Rivas.
O artista di que estas obras tratan de "buscar pequenos puntos de interese na propia paisaxe" e que "están integradas e mesmo pasan desapercibidas". Juan Rivas engadiu que a exposición pode ser entendida como "un xogo", no que hai que atopar as ilustracións e os escenarios representados.
Aquí os lenzos son postes da luz, do teléfono ou mesmo o pau dunha canastra. Elementos que normalmente afean a paisaxe pero que dende hai uns días son auténticas obras de arte.
O Concello ten previsto xeolocalizar estas obras de arte para que tanto os veciños coma os turistas poidan descubrir estas paisaxes que se funden coa propia paisaxe.
.png)
