Sánchez e Feijóo debaterán no Senado sobre o aforro enerxético

O presidente do Goberno, Pedro Sánchez, comparecerá no Senado a petición propia para informar achega do plan de aforro enerxético provocado pola guerra en Ucraína e sobre o seu impacto territorial e social, segundo anunciou a portavoz do Executivo, Isabel Rodríguez. 

O Goberno anunciou que vai rexistrar esta petición de comparecencia, que se produce despois de que o pasado sábado o líder da oposición, Alberto Núñez Feijóo, emprazara o xefe do Executivo para debater na cámara alta as medidas para aforrar enerxía.

A comparecencia de Sánchez non será un cara a cara exclusivo con Alberto Núñez Feijóo, pero si lle permitirá intervir como senador xunto aos portavoces dos demais grupos parlamentarios da cámara alta. 

Na conferencia de prensa posterior ao Consello de Ministros a portavoz de Goberno explicou que o debate, que pretenden "sereno, construtivo e propositivo", persegue enfrontar modelos e proxectos ante o reto na enerxía, marcado pola ameaza de que Rusia corte a subministración de gas a Europa.

"O Goberno ten claro cal é o seu modelo ante estas ameazas, imos traballar para que esta crise non a paguen os de sempre", recalcou Rodríguez, facendo referencia á protección de familias, empresas e traballadores. 

A comparecencia non contentou o PP. Fontes deste partido trasladan que o feito de que Sánchez só explique no Senado "un decreto xa validado no Congreso evidencia a súa falta de interese en debater con Alberto Núñez Feijóo de política xeral".

Denuncia o PP que "Sánchez fala do que el quere, non do que á cidadanía lle preocupa" e destaca que Sánchez está "a tempo de rectificar e comparecer para falar das incertezas económicas e sociais que afectan a este país, e non só de enerxía".