"A DINA continúa, non saian", Sánchez roga a cidadáns de Valencia e Castelló que queden na casa

O presidente do Goberno, Pedro Sánchez, pediu aos cidadáns das provincias de Valencia e Castelló que queden na casa: "A DINA continúa, non saian, atendan as chamadas dos servizos de emerxencia e todas as súas recomendacións".

Así o manifestou este xoves logo da durante a súa visita ao Centro de Coordinación Operativo Integrado (CECOPI) da Comunidade Valenciana, desde o que se coordinan os labores de emerxencia nas zonas afectadas pola DINA, en l'Eliana.   

Sánchez garantiu a colaboración do Executivo coa Comunidade Valenciana "por terra, mar e aire" e todo o tempo que faga falta para facer fronte ás consecuencias da DINA.

Sánchez transmitiu esa colaboración nunha declaración tras visitar, xunto ao presidente da Comunidade Valenciana, Carlos Mazón, o Centro de Coordinación Operativo Integrado desde o que se coordinan os labores de emerxencia nas zonas afectadas pola DINA e onde participou no minuto de silencio que se gardou ao mediodía polas vítimas das inundacións.

O xefe do Executivo recalcou que o Goberno vai seguir achegando todos os recursos posibles e insistiu no compromiso de "absoluta cooperación" co Executivo valenciano para dar tranquilidade e seguridade aos cidadáns.

Sánchez asegurou que, desde que a Comunidade Valenciana elevou a nivel 2 esta traxedia, o Goberno mobilizou "unha cantidade inxente de recursos e efectivos". En concreto, detallou que son máis de 1.100 efectivos da UME os que se desprazaron, 1.800 policías nacionais, 750 gardas civís, 200 efectivos do Exército de Terra ou 335 vehículos, helicópteros e avións.  

Nestas circunstancias, o presidente do Goberno puxo en valor o traballo de todas as unidades, de todos os corpos de Protección Civil, que "están a traballar día e noite para poder atopar as persoas agora mesmo desaparecidas, tamén atopar os corpos das persoas falecidas por esta traxedia e tratar tamén de contribuír a que os cidadáns poidan lograr recuperar o seu día a día o máis pronto posible".  

Sánchez reafirmou o compromiso do Goberno coa Comunidade Valenciana e solidarizouse coas vítimas e os seus familiares e trasladou tamén o compromiso do Executivo "por terra, mar e aire, por todos os medios, o tempo que faga falta, con todos os recursos posibles, para atopar ás persoas desaparecidas".

"Calquera recurso máis que necesiten aquí está o Goberno de España. Non imos deixar sós aos valencianos, imos estar convosco todo o tempo que faga falta, con todos os recursos e medios posibles", comentou Sánchez, á vez que destacou que "a prioridade agora mesmo é atopar as vítimas, os desaparecidos, para aplacar a ansiedade e a angustia que poidan estar a sufrir as familias".  

Igualmente, prometeu todos os recursos do Estado desde o punto de vista económico para a reconstrución e a recuperación da normalidade "canto antes mellor".  

Neste sentido, o líder do Executivo subliñou que no próximo Consello de Ministros, que se celebrará o martes, van declarar zona catastrófica á Comunidade Valenciana e aos territorios afectados "por esta tráxica DINA".

Pola súa parte o presidente da Generalitat Valenciana, Carlos Mazón, agradeceu a Sánchez a visita e a colaboración do Goberno central e desmarcouse das críticas que momentos antes realizara no mesmo lugar o presidente do PP, Alberto Núñez Feijóo.

"Moitas grazas presidente, pola túa proximidade e pola túa presenza", dixo Mazón, "recibimos esta mensaxe con moito cariño".

Carlos Mazón tamén antes desa comparecencia anunciara que o Goberno valenciano prevé aprobar o vindeiro martes un primeiro decreto de axudas aos damnificados pola gota fría na provincia de Valencia, con 250 millóns de euros.

Mazón precisou que se tratará de axudas complementarias ás que ofrezan outras administracións, como o Goberno de España, e supoñerán por exemplo un mínimo de 6.000 euros por afectado en axudas "directas, exprés, sen burocracia" para arranxar as casas ou comprar mobles.