Sectores como a construción ou a hostalería tratan de adaptarse á falta de persoal cualificado
Fontaneiros, electricistas, mecánicos, pintores ou carpinteiros son outros dos profesionais máis demandados
A falta de man de obra cualificada converteuse nun dos principais retos nalgúns dos sectores máis importantes da nosa economía. É o caso da construción, onde a carencia de persoal dabondo fai que se atrasen as obras durante meses e incluso anos, ademais de encarecer os prezos.
"Cando hai moitísima demanda e poquísima oferta, empezan os prezos a dispararse. E moito tempo de espera nas obras. Para substituir un prato de ducha, por exemplo, é moito o que hai que agardar", explica Ignacio García Armas, encargado dunha empresa de reformas.
No caso da hostalería, o sector tivo que adaptarse á falta de camareiros ou cociñeiros. Fíxoo reducindo horarios e suprimindo servizos, sobre todo nas ceas pola semana.
"Encontrar a alguén cualificado é case imposible. Como non teñas contigo que leve contigo de tempo atrás, tes un problema. E a esa xente tes que darlle calidade de vida, polo que tes que recortar horario", indica Pablo Fernández, xerente dun restaurante.
Debido á falta de relevo xeracional, fontaneiros, electricistas, mecánicos, pintores ou carpinteiros son outros dos profesionais máis demandados.
