Os hutís confirman 18 ataques dos EUA e do Reino Unido e prometen "castigo"
Os hutís confirman 18 ataques dos EUA e do Reino Unido e prometen "castigo"
O Pentágono explica que os obxectivos foron un almacén subterráneo de mísiles e posicións de vixilancia aérea dos rebeldes do Iemen
Prodúcese dez días despois do primeiro, ao que seguiron outros dos EUA, tras varias ducias de accións contra buques no mar Vermello
Horas antes, os hutís reivindicaban un novo ataque a un barco estadounidense, no golfo de Adén, o cuarto en menos dunha semana
Os ministros de Exteriores da UE avalan crear unha misión naval no mar Vermello
![@centcom](https://img-g24-crtvg.flumotion.com/prog24/2024/20240123/uscentralcommand.jpg)
Os rebeldes xiítas hutís do Iemen confirmaron hoxe que os Estados Unidos e o Reino Unido realizaron dezaoito ataques contra as súas posicións en tres provincias iemenís, e prometeron "resposta e castigo".
"Os avións (militares) da agresión estadounidense-británica lanzaron 18 ataques aéreos durante as últimas horas (...). Estas agresións non quedarán sen resposta e castigo", dixo o portavoz militar hutí, Yehya Sarea, na súa conta oficial en X.
O portavoz explicou que os novos ataques conxuntos dos EUA e do Reino Unido tiveron como branco supostas posicións do movemento xiíta proiraniano na capital iemení, Saná, e as súas inmediacións, así como nas provincias de Taiz, Al Bayda e Al Hudeidah, no centro e no oeste do país árabe.
Esta última, que segundo Sarea foi branco de tres dos dezaoito bombardeos, sitúase na costa do mar Vermello e conta co porto do mesmo nome, preto do estreito de Bab el Mandeb, onde numerosas embarcacións foron ameazadas ou atacadas polos insurxentes hutís nas últimas semanas.
O Pentágono explica que os obxectivos foron un almacén subterráneo de mísiles e posicións de vixilancia aérea dos rebeldes do Iemen
O Pentágono informou esta madrugada dos bombardeos dos EUA e do Reino Unido contra varias posicións dos rebeldes hutís, realizados pasada a medianoite do luns a martes, e que supuxeron a segunda operación conxunta das dúas potencias occidentais contra ese grupo iemení, apoiado por Irán.
NEWS: Joint Statement From Australia, Bahrain, Canada, the Netherlands, United Kingdom and United States on Additional Strikes Against the Houthis in Yemen https://t.co/L6MpyJGLbq
— Department of Defense 🇺🇸 (@DeptofDefense) January 23, 2024
Os bombardeos, segundo indicaron, tiveron como obxectivo sistemas de mísiles, así como de defensa aérea e radares usados polos hutís, ademais dun dos almacéns subterráneos onde este grupo garda algúns dos mísiles que utilizan contra embarcacións no mar Vermello.
A operación dirixiuse contra oito áreas baixo control hutí, que supostamente estaban a ser usadas como bases de operacións contra as embarcacións no mar Vermello, segundo o Comando Central do Exército estadounidense (Centcom), que non informou de mortos no operativo.
U.S. Forces, Allies Conduct Joint Strikes in Yemen
— U.S. Central Command (@CENTCOM) January 22, 2024
As part of ongoing international efforts to respond to increased Houthi destabilizing and illegal activities in the region, on Jan. 22 at approximately 11:59 p.m. (Sanaa / Yemen time), U.S. Central Command forces alongside UK… pic.twitter.com/BQwEKZqMAo
O portavoz militar hutí non se referiu pola súa banda a vítimas, e tampouco revelou detalles sobre a esperada "resposta e castigo" que o seu grupo prepara, aínda que os hutís anunciaron ataques con mísiles e drons nas últimas semanas contra navíos vinculados con Israel, ou cara a territorio do Estado xudeu.
Prodúcese dez días despois do primeiro, ao que seguiron outros dos EUA, tras varias ducias de accións contra buques no mar Vermello
O novo ataque prodúcese dez días despois de que Estados Unidos e o Reino Unido lanzasen un primeiro ataque conxunto contra 60 obxectivos no Iemen relacionados cos hutís, no que foi o primeiro grande acto de represalia contra os insurxentes polos ataques no mar Vermello.
Desde que se producise ese primeiro ataque conxunto, os Estados Unidos lanzaron por separado varios ataques contra os hutís, moitos deles contra mísiles que, segundo Washington, supoñían unha ameaza inminente para embarcacións no mar Vermello.
Os ministros de Exteriores da UE avalan crear unha misión naval no mar Vermello
Os ministros de Exteriores da Unión Europea acordaron este luns a necesidade de crear unha misión naval europea no mar Vermello para garantir a seguridade de navegación na zona.
Os Vinte e sete aínda teñen que ultimar os detalles sobre o mandato da misión e o calendario sobre a súa posta en marcha, explicou o alto representante da UE para Asuntos Exteriores, Josep Borrell, ao termo da reunión que mantiveron en Bruxelas os ministros de Exteriores.
A intención da UE é que os barcos europeos escolten ás navieiras que pasan polo estreito de Bab el Mandeb, e que ademais conten coa capacidade de derrubar os drons e os mísiles que puidesen lanzarlles os hutís, segundo fontes diplomáticas.
Os rebeldes hutís, que controlan Saná e amplas áreas do norte, centro e o oeste de Iemen desde 2014, defenden que os seus ataques son unha represalia pola ofensiva que Israel lanzou sobre a Franxa de Gaza despois do ataque do brazo armado do grupo palestino Hamas o 7 de outubro.