Seis anos de conflito veciñal e máis dunha ducia de denuncias nunha aldea da Peroxa

O pesadelo dos habitantes dunha aldea do concello ourensán da Peroxa semella non ter fin. Denunciaron en múltiples ocasións un veciño conflitivo e mesmo conseguiron ordes de afastamento, pero nin sequera iso acabou coas ameazas e o vandalismo do acusado. 

Un auténtico inferno din que viviron aquí varios dos veciños desta aldea do Mato, no concello ourensán da Peroxa, cun veciño que os acosaba e que lles facía todo tipo de actos vandálicos, ademais de insultos e ameazas.

Un dos veciños conseguiu nos xulgados unha orde de afastamento contra el, que tamén incumpriu, e agora está pendente dun novo xuízo. Ademais, outra das veciñas que sufriu o acoso ten pendente aínda de celebrarse os xuízos no xulgado cinco denuncias contra este veciño. 

"Saíu a orde de afastamento que non se podía achegar a menos de 500 metros da casa e de min, pero el seguía vindo igual e veu a Garda Civil e dixéronme que non podían facer nada", conta Constantino García, veciño do Mato. 

"Realmente non se podía vivir", di Ana Vázquez, veciña do Mato, que ten cinco denuncias contra o veciño que a acosaba. 

Constantino e Ana, veciños do Mato, no concello da Peroxa, teñen pendentes de resolver no xulgado, polo menos, seis denuncias contra o veciño que os acosaba. 

Sufrían cortes de luz e de auga e tamén lle desfixo o coche a outro veciño. 

"Había veces que viña a Garda Civil do Carballiño ata catro veces na tarde", asegura Constantino García. 

Ademais das forzas de seguridade e á xustiza tamén pediran axuda hai oito meses á Televisión de Galicia.

Despois de seis anos de conflito, Ana di que estes feitos prexudicaron a súa saúde mental e a do seu fillo. Ela ten depresión severa e tivo que aumentar a medicación e o seu fillo tamén colleu unha depresión polo o acoso continuo que sufrían a súa nai e a súa avoa. 

"Sen eles isto é outra cousa, pero con eles era un verdadeiro inferno", di ana Vázquez, veciña do Mato.