Susto importante o que levaron nos Mallos por mor dun incendio nunha vivenda que quedou practicamente calcinada

"Escoitamos explosións e despois xa vimos as lapas que saían polo tellado". "O susto que levamos foi grande porque non sabiamos que pasaba", contan os veciños da rúa A Paz.

Minutos antes, contra as sete da tarde, comezaba un incendio no último andar dun inmoble da rúa A Paz. Daquela, no interior non había ninguén.

"Vive un matrimonio coa súa filla e baixaran dez minutos, cando volveron á casa xa se atoparon co lume".

O lume foi tan voraz que calcinou case por completo a vivenda.

"A vivenda quedou inservible, faremos algo para axudalos porque levan aquí 25 anos e é moi boa xente". "Afectou á cocina, ao baño, ao cuarto da nena e todos os cuartos que dan para a parte de atrás, queimáronse".

Polo que os inquilinos non puideron regresar ao seu fogar.

"Pasaron a noite no hostal. E a propietaria xa lle dixo que aí poden quedar unhas noites".

Esta mañá os prexudicados estaban á espera dos seguros para que lles puideran achegar unha solución.