Tensión na Coruña: dous membros dos Riazor Blues detidos e ultras do Málaga estragan un bar

Dúas persoas foron detidas este domingo por enfrontamentos coa Policía na Coruña antes do partido que disputarán a partir das 14:00 horas o R. C. Deportivo e o Málaga C. F.

Fontes policiais confirmaron a Europa Press que as persoas detidas tras enfrontamentos coas unidades de intervención policial na zona da praza de Pontevedra están relacionadas coa afección do Dépor. Así mesmo, estas mesmas fontes sinalaron que non se tratou dun enfrontamento entre afeccións.

Estes feitos prodúcense despois de que onte á noite un cento de ultras do Málaga provocaran desfeitas pola contorna da rúa Manuel Murguía. En concreto, romperon a cristaleira dun bar e diferentes obxectos tanto do establecemento coma do mobiliario urbano. Detivéronse ás portas dun bar cando identificaron varios Riazor Blues no interior. Non chegou a producirse un enfrontamento entre eles porque os propietarios conseguiron pechar a porta a tempo. O que non puideron evitar foron os estragos. 

Segundo fontes consultadas por Europa Press, polo momento non se produciu ningunha detención por estes incidentes e, tras a chegada de efectivos da Policía Nacional, regresaron á hospedaxe na que se atopaban aloxados fóra da Coruña.

Neste contexto, durante a mañá deste domingo víronse imaxes de numerosos grupos de persoas vestidas de negro con paus e barras por diferentes zonas da cidade, como o barrio do Orzán ou o Paseo de Riazor.

As forzas de seguridade investigan o sucedido e para este domingo mantense o reforzo policial, xa que o partido xa fora declarado de alto risco pola Comisión Antiviolencia. Pasadas as once da mañá, case tres horas antes do inicio do encontro, os afeccionados do Málaga foron escoltados pola Policía ata as portas do estadio.

Condena da alcaldesa e da Liga, que se personará como acusación

Mentres, a alcaldesa da Coruña, Inés Rey, condenou os "intolerables actos protagonizados por seguidores do Málaga" na cidade e a súa "solidariedade cos negocios afectados".

Tamén apuntou que a Policía traballa para identificar os responsables do ocorrido e "responderán ante a Xustiza". "Pido responsabilidade para o partido de hoxe (domingo) en Riazor", conclúe.

Do mesmo xeito, a Liga condenou tamén os incidentes, que considera que "prexudican gravemente" a imaxe do fútbol español. "LaLiga condena enerxicamente os incidentes violentos ocorridos na noite de onte por parte de afeccionados radicais do Málaga Cf. Estes actos non teñen cabida no deporte nin na sociedade, e prexudican gravemente a imaxe do fútbol español", apuntou.

"Como parte do noso firme compromiso coa erradicación da violencia no deporte, LaLiga comparecerá como acusación nos procedementos xudiciais que se deriven destes feitos, colaborando coas autoridades para identificar e sancionar aos responsables", finalizou.