Todos os clubs menos o Madrid emiten un comunicado de rexeitamento do caso Negreira

Tras a aprobación por parte da súa Comisión Delegada, reunida este martes, LaLiga emitiu un comunicado no que mostra o seu rexeitamento aos feitos do caso Negreira.

“LaLiga e a súa Comisión Delegada rexeitan e repudian os feitos, e están profundamente preocupados e traballando activamente por esclarecer calquera irregularidade que se puido producir arredor do caso Negreira, xa sexa de carácter deportivo ou de calquera outra índole”, reza a nota da patronal.

Este é o primeiro comunicado conxunto dos clubs profesionais, aínda que non conta coa aprobación nin do Barcelona nin do Real Madrid, que non pertencen á citada comisión. Xa o luns pola tarde, ambos os clubs, durante a Xunta de División celebrada, non foron partidarios de facer un comunicado conxunto condenando os feitos.

“O Madrid quería acordar o comunicado, algo case imposible de facer con 42 clubs. Javier Tebas ofreceu que o Madrid o redactase e os clubs validariámolo, pois é obvio que todos repudiamos o que fixo o Barça, pero tras consultar o representante do Madrid cos seus superiores, dixo que non podían facelo”, asegura o presidente dun club presente na reunión.

O Barcelona, pola súa banda, ao estar implicado no asunto, rexeitouno a través do seu director xeral, Mateu Alemany. O propio comunicado de LaLiga confirma a negativa de ambos os clubs, aínda que non os nomea.

“No día de onte, durante a Xunta de División, a maioría dos Clubs de LaLiga expresaron a súa profunda preocupación por este caso, que consideran de máxima gravidade, polo que a proposta dunha comunicación conxunta recibiu o apoio unánime de todos os clubs de LaLiga SmartBank e todos os clubs de LaLiga Santander salvo dous, que amosaron obxeccións a ese comunicado conxunto por diferentes motivos”.

Os clubs ven tras a postura do Real Madrid a condenar os feitos, a alianza que o seu presidente Florentino Pérez mantén co Barcelona e con Joan Laporta na batalla da Superliga.