Traballo e os axentes sociais debaterán este luns o borrador sobre reducción de xornada
Traballo e os axentes sociais debaterán este luns o borrador sobre reducción de xornada
O texto foi enviado o pasado venres aos empresarios e aos sindicatos e non prevé un aumento de horas extra por rebaixar a xornada ordinaria
![](https://img-g24-crtvg.flumotion.com/prog24/2024/20240623/plan-emprego-040523.png)
O Ministerio de Traballo e Economía Social reunirase este luns con CCOO, UXT, CEOE e CEPYME para debater o borrador do anteproxecto de lei sobre a redución da xornada máxima legal, sen diminución salarial, ata as 38,5 horas semanais en 2024 e ata as 37,5 horas en 2025.
O encontro celebrarase ás 12:00 horas no Ministerio e terá lugar despois de que os axentes sociais recibisen o pasado venres o texto elaborado polo Departamento que dirixe Yolanda Díaz sobre unha das medidas estrela da lexislatura: a redución da xornada laboral, unha iniciativa que vai acompañada por unha reforma do rexistro horario para garantir que as empresas cumpren os límites legais sobre o tempo de traballo.
Segundo o borrador, Traballo quere multar con ata 10.000 euros por traballador as empresas que incumpran co rexistro horario e a redución da xornada semanal máxima a 38,5 horas en 2024 e a 37,5 horas en 2025. Isto supón un endurecemento das sancións actuais en materia de xornada por dúas vías: en primeiro lugar, porque se multará as empresas por cada traballador co que se incumpran as normas e non de maneira global, e en segundo lugar, porque o importe das multas, tipificadas como infracción grave dos empresarios, será máis cuantioso, pasará dun máximo de 7.500 euros a 10.000 euros.
Así, de acordo co borrador, a transgresión das normas e os límites legais ou pactados en materia de xornada, traballo nocturno, horas extraordinarias, horas complementarias, descansos, vacacións, permisos, rexistro de xornada e, en xeral, o tempo de traballo sancionarase, no seu grao mínimo, con multas de 1.000 a 2.000 euros; no seu grao medio, de 2.001 a 5.000 euros, e, no seu grao máximo, de 5.001 a 10.000 euros.
Na lexislación actual da Lei sobre Infraccións e Sancións da Orde Social, coñecida como LISOS, a contía das multas por transgredir os límites legais do tempo de traballo vai de 751 a 1.500 euros no seu grao mínimo; de 1.501 a 3.750 euros no seu grao medio, e de 3.751 a 7.500 euros no seu grao máximo.
Así mesmo, Traballo sinala no borrador entregado onte aos axentes sociais que se considerará a comisión dunha infracción por cada traballador afectado. No caso de incumprimento das obrigacións en materia de rexistro de xornada, unicamente se considerará a comisión dunha infracción por cada traballador afectado nos supostos de ausencia de rexistro e nos de omisión de datos ou inclusión de datos falsos ou inexactos.