Tráfico prevé cinco millóns e medio de desprazamentos nas estradas de Galicia
Tráfico prevé cinco millóns e medio de desprazamentos nas estradas de Galicia
A campaña do 1 de agosto comeza ás 15 horas e finaliza este xoves á medianoite
A Dirección Xeral de Tráfico prevé 5,5 millóns de desprazamentos nas estradas de Galicia en agosto, un mes que rexistra o maior volume de viaxes en coche de todo o ano.
Ante esta situación, a delegada do Goberno na Coruña, María Rivas, pediu este mércores "prudencia e responsabilidade ao volante", coincidindo coa operación 1 de agosto, que arrinca ás 15 horas e finaliza este xoves a medianoite.
Rivas lamentou que no que vai de ano nas estradas da provincia da Coruña se rexistrasen "un total de 23 vítimas falecidas, oito máis que en 2023".
"O Goberno non escatima nin un só esforzo en combater esta sinistralidade mortal, con campañas de vixilancia e prevención que se desenvolven durante todo o ano", manifestou.
A maior afluencia de vehículos desta operación saída producirase este mércores entre as 15 e as 23 horas.
En toda Galicia están activadas 355 cámaras de vixilancia e 402 estacións de tomas de datos, ademais de 487 paneis de mensaxes en tempo real con datos e recomendacións.
