Morren catro mozos ao caer o seu coche por unha ladeira en Cantabria

Os catro ocupantes dun vehículo, dúas mulleres e dous homes de 21 anos e naturais de Madrid, faleceron esta noite despois de que o coche no viaxaban pola CA-643 se lles fora da vía, á altura do porto de Lunada (Cantabria).

Ás dez da noite, o centro de emerxencias do goberno de Cantabria recibiu unha chamada desde o teléfono móbil dun dos ocupantes do coche sinistrado, que enviou unha alerta automática tras detectar o impacto.

O vehículo acababa de precipitarse por unha ladeira de 300 metros de altura.

"O accidente produciuse no porto de Lunada, que é un porto de montaña limítrofe con Burgos", explica Eugenia Gómez Diego, delegada do Goberno de Cantabria.

"Hai un precipicio moi pronunciado e entón unha saída de vía provocou que o vehículo caera en tonel e deu moitas voltas de campá, calculamos que 300 metros de caída", relata José Miguel Tolosa, xefe de tráfico de Cantabria.

Ao rescate acudiron nun primeiro momento os bombeiros de Villacarriedo, persoal de estradas, da Garda Civil e do 061, pero ante a gravidade do accidente e as dificultades para acceder ata o coche, sumáronse os bombeiros de Santander e técnicos do goberno de Cantabria.

Os labores de rescate dos corpos finalizaron ás seis da mañá. Tráfico está investigando os motivos polos que o coche se foi da vía.

"A estrada estaba aberta no momento do accidente pero estaba nevando un pouco parece ser", asegura a delegada.

Os corpos dos falecidos foron trasladados ao Instituto de Medicina Legal de Cantabria. Un equipo de psicólogos atendeu os catro mozos que circulaban detrás do coche sinistrado e que saíron ilesos.