Transportes encarga o estudo informativo da variante do AVE a Vigo por Cerdedo

O Ministerio de Transportes e Mobilidade Sostible licitou por 998.400 euros a redacción dun estudo informativo complementario para tramitar a avaliación de impacto ambiental da variante do AVE por Cerdedo.

Este novo ramal ten o obxectivo de mellorar a conexión ferroviaria da cidade de Ourense con Pontevedra e Vigo.

Este estudo, segundo destaca o ministerio, dá continuidade aos traballos xa realizados para a execución dun tramo ferroviario de gran complexidade técnica, particularmente no que se refire á hidroxeoloxía do terreo.

Con este novo informe, o Goberno busca incorporar e completar as análises realizadas no seu día e adaptalos aos cambios normativos que tiveron lugar nos últimos anos.

Transportes quere someter esta actuación en materia ferroviaria a información pública e audiencia, de acordo coa normativa sectorial, así como á avaliación de impacto ambiental á que obriga a lexislación ambiental.

O contrato inclúe a realización dunha campaña xeolóxica e xeotécnica que complete as investigacións anteriores e garanta que a documentación para a avaliación ambiental conte con toda a información necesaria.

Ademais, a redacción do estudo informativo deberá describir a solución técnica xa definida, adaptada á normativa actual e incorporando as análises previas como os resultados da nova campaña xeotécnica, coa inclusión do estudo de impacto ambiental.

Transportes sostén que este estudo é unha mostra máis do seu compromiso con Galicia e, en concreto, coa cidade de Vigo, en cuxo contorna se están realizando outros estudos informativos para mellorar a súa conexión con Portugal e mellorar a súa operatividade ferroviaria.

Ademais, subliña que se reforza tamén a modernización que a rede ferroviaria galega veu experimentando nos últimos anos.