Tres encapuchados atracan unha parella en Meis pistola en man e bótanlle gasolina
Tres encapuchados atracan unha parella en Meis pistola en man e bótanlle gasolina
O suceso, "de extrema violencia", produciuse de madrugada, cando a parella saía da súa casa camiño do traballo
A Garda Civil busca os asaltantes en toda a comarca da Arousa
A Garda Civil busca tres homes que asaltaron unha parella en Meis (Pontevedra) esta mañá para roubalos. Segundo informou o subdelegado do Goberno en Pontevedra, Abel Losada, o suceso produciuse a primeira hora desta mañá, sobre as 5:30 horas, cando saían da súa casa camiño do traballo.
Foron abordados no exterior da súa vivenda e obrigados a introducirse de novo na mesma. Colocáronlles bridas e obrigáronlles a entregar o diñeiro que gardaban no domicilio.
Tanto o home como a muller foron "brutalmente golpeados". A ela ademais botáronlle gasolina por riba e ameazárona cunha pistola que non se sabe aínda se era real ou simulada. Neste momento ambos permanecen ingresados nun centro hospitalario recuperándose das lesións sufridas.
"Os feitos producíronse cunha extremada violencia e non teñen precedentes recentes nin encaixan nos parámetros de delitos similares en roubos en vivendas nos últimos anos na provincia", informou o subdelegado.
Axentes da Garda Civil traballaron durante varias horas no rexistro do domicilio das vítimas, situado na parroquia da Moroza. Abandonárono pasadas as 12.00 horas con varias bolsas con probas. Polo momento, non se descarta ningunha hipótese.
O subdelegado do Goberno sinalou que os sospeitosos parecen ser de nacionalidade española. Losada confirmou que a Garda Civil despregou un gran dispositivo de busca, con controis policiais nas estradas de toda a comarca de Arousa.
