Preocupación na Mariña ante unha vaga de roubos en establecementos comerciais

O restaurante Casa Domingo de Covelas, no concello de Ribadeo, foi unha das últimas vítimas da vaga de roubos que nos últimos días afecta á comarca da Mariña. Pasaba pouco das dúas da madrugada cando o propietario, que vive enriba do local, sentiu un forte golpe.

Non fixo caso pensando que se lle caera algo ao chan a súa filla, aínda que si lle chamou a atención que pouco despois o volvese espertar o forte son dun tubo de escape e o ruído dun coche derrapando. Os ladróns desactivaron as alarmas.

Xa pola mañá descubriu a desfeita que os ladróns orixinaron dentro do local. Unha ventá rota, a caixa rexistradora aberta e sen cartos, e esquilmadas as existencias. Os ladróns levaron as botellas de bebida máis caras e gran cantidade de embutidos. 

Esa mesma madrugada do sábado ao domingo, un par de horas máis tarde e a pouco máis de 20 quilómetros de distancia, outro establecemento comercial, esta vez en Lourenzá, foi obxectivo doutro intento de roubo.

Nesta ocasión os ladróns non lograron entrar. Aínda que forzaron o cilindro, as barras de ferro que fixan as portas ás bisagras impedíronllelo. Ante o intento frustrado, tentaron forzar as contras de madeira que protexen a ventá pero un enxeñoso sistema interior deseñado hai anos polo avó da propietaria impediu que entrasen.  

En días anteriores denunciaron algún roubo tamén na Pontenova. A Garda Civil investiga esta vaga de asaltos. Non se desbota que se trate todo da mesma banda.