Tres mulleres quedan feridas en Lugo nunha liorta entre familias rivais

Multitudinaria pelexa entre membros de dous clans nun centro comercial de Lugo. As persoas implicadas chegaron a usar gas pementa e tres mulleres tiveron que ser trasladadas en ambulancia ao hospital.

A inimizade entre as dúas familias implicadas na pelexa conta cun longo historial de denuncias mutuas. Este luns coincidiron nun centro comercial de Lugo, onde iniciaron unha lea que rematou con tres mulleres feridas.

Durante a discusión, en que participaron unha ducia de persoas, un deles sacou un aerosol defensivo e esparexeuno sobre os integrantes do outro grupo. A seguridade do centro e o persoal dos restaurantes avisaron do altercado. Interviñeron axentes da Policía Nacional e Local.

"Trátase de dúas familias con problemas entre eles. Hai denuncias cruzadas no pasado. Os axentes separaron as partes e alí manifestaron que unha das participantes esparexera aerosol de pementa sobre a outra das partes", comenta Manuel Arias, voceiro da Policía Nacional de Lugo.

As forzas de seguridade identificaron as persoas participantes na liorta e requisaron o aerosol, que se vai analizar para establecer as posibles propostas de sanción. 

"Investigarase se é un spray que se pode utilizar legalmente, aínda que cun uso incorrecto, ou ben se é un aerosol que non se vende legalmente nas armerías e tamén se proporá para a sanción correspondente. Se é un aerosol legal a irritación é momentánea, pero se é dos que non están permitidos en España pode ter consecuencias importantes de irritación e afectar a pel e causar perda de visión", di Manuel Arias. 

A pelexa produciuse no momento de maior clientela nos locais de restauración e a situación orixinou alarma e preocupación entre as persoas próximas ao altercado.