Rescatan outros 261 subsaharianos en cinco lanchas, unha á valga, en augas canarias
Rescatan outros 261 subsaharianos en cinco lanchas, unha á valga, en augas canarias
Unha sexta embarcación chegou polos seus propios medios á costa
![](https://img-g24-crtvg.flumotion.com/prog24/2024/20240609/migerantesrescatadosencanarias.png)
Salvamento Marítimo rescatou este domingo cinco embarcacións con 261 persoas migrantes a bordo en augas de Lanzarote e Fuerteventura, mentres que unha sexta con 8 ocupantes chegou polos seus propios medios á costa de Puerto del Rosario.
A primeira embarcación foi localizada a pasada madrugada a 20 millas ao nordés de Arrecife, polo que o Centro de Coordinación de Salvamento nas Palmas mobilizou a salvamar Al Nair, que rescatou os seus 46 ocupantes, todos de orixe magrebí. Xa en terra, foron asistidos por persoal sanitario do Servizo de Urxencias Canario (SUC) e de Atención Primaria, así como por voluntarios de Cruz Vermella, e realizouse un traslado ao Hospital Doutor José Molina Orosa por diferentes patoloxías.
Pouco despois das 9:30 horas, recibiuse outro aviso por parte de Salvamento Marítimo para prestar atención humanitaria a 44 persoas que tamén foran rescatadas preto de Lanzarote. Unha muller en estado de xestación foi evacuada ao Hospital por protocolo, segundo informou o 1-1-2. Ao longo da xornada, a salvamar Izar, a gardamar Talía e a gardamar Concepción Arenal rescataron a 171 migrantes que viaxaban a bordo de tres pneumáticas. Todas elas foron trasladadas a Puerto del Rosario, en Fuerteventura.
Á primeira hora, a Policía Nacional tamén deu aviso de que unha embarcación con 8 persoas chegara polos seus propios medios á illa de Fuerteventura, aínda que presentaban bo estado de saúde e non se realizaron traslados a centros sanitarios. En total, esta fin de semana chegaron ata 16 embarcacións ás illas de Fuerteventura e Lanzarote a través da ruta migratoria canaria. Durante a xornada do sábado, o dispositivo do SUC e Cruz Vermella asistiu a 373 migrantes chegados en oito embarcacións a Lanzarote e Fuerteventura. Ao peirao de Gran Tarajal chegaron dúas pneumáticas con 58 persoas, todas en bo estado de saúde. A Lanzarote chegaron seis embarcacións con 315 persoas que foron asistidas no peirao de Arrecife polo persoal sanitario. Dúas mulleres xestantes e un mozo foron evacuados ao Hospital Doutor José Molina Orosa.