Donald Trump debe pagar 83 millóns de dólares por difamar a xornalista Carroll
Donald Trump debe pagar 83 millóns de dólares por difamar a xornalista Carroll
Son cifras moito máis altas das baralladas durante o xuízo
É a segunda vez que gaña unha causa contra o exmandatario
![](https://img-g24-crtvg.flumotion.com/prog24/2024/20240127/202401265686WD-USA-TRUMPDEFAMATION-LAWSUIT-DEPARTURES_O__frame_691.png)
O expresidente dos Estados Unidos Donald Trump (2017-2021) foi condenado a pagar 83,3 millóns de dólares por difamar a E. Jean Carroll no 2019, cando dixo que non coñecía a xornalista e que a súa acusación de abuso sexual era falsa.
Tras tres horas deliberando, un xurado formado por sete homes e dúas mulleres decidiu de xeito unánime que o republicano debía pagar 18,3 millóns, en concepto de danos e prexuízos, e 65 máis por danos punitivos, cifras moito máis altas das baralladas durante o xuízo.
Tras a lectura da resolución, Carroll fundiuse nunha aperta coas súas avogadas, pero non quixo facer declaracións á prensa á saída do xulgado.
"Totalmente ridículo"
Trump, que estivo presente no último día do xuízo, abandonou a corte antes de que se coñecese o resultado final e na súa rede social, Truth Social, cualificou de "totalmente ridículo" o veredicto. Para el, é unha mostra de que "o noso sistema legal está fóra de control e úsase como arma política".
Durante as dúas semanas do proceso, o magnate non parou de publicar nas súas redes que non coñecía a Carroll e que o xuízo se trataba dunha caza de bruxas, ata o punto de que algúns dos seus comentarios se usaron como evidencia polo equipo legal de Carroll.
Esta é a segunda vez que a xornalista e a súa avogada, Roberta Kaplan, gañan un xuízo a Trump. O pasado maio, un xurado condenou o exmandatario por abuso sexual por inserir os seus dedos na vaxina de Carroll sen consentimento, así como por difamación e a pagar 5 millóns de dólares.
![](https://img-g24-crtvg.flumotion.com/prog24/2024/20240127/202401265701WD-USA-TRUMPDEFAMATION-LAWSUIT-SKETCHES-UP_O__frame_647.png)