Trump participa no "mitin da vitoria" poucas horas antes de tomar posesión como presidente

A poucas horas de xurar por segunda vez como presidente dos Estados Unidos, Donald Trump celebra o chamado "mitin da vitoria" cos seus seguidores no estadio de Washington. Un acto no que tamén intervén o vicepresidente Vance e o empresario Elon Musk, convertido agora na man dereita do presidente.

Miles de partidarios do presidente electo agardaron durante horas, a pesar das baixas temperaturas de Washington, para poder asistir ao ultimo mitin de Donald Trump antes da súa investidura.

Cristina, que chegou desde Baltimorre conta que está aquí porque é o mellor día de todos, que está emocionada polo regreso de Trump e que está lista para que o mundo cambie.

Outro dos seguidores do presidente asegura que decidiu asistir ao mitin porque só tiña entradas para o acto de xura no exterior pero non dentro do Capitolio.

E outra explica que vén preparada con roupa térmica para non pasar frío e entende que o xuramento sexa a porta pechada pola seguridade do presidente.

A cerimonia non será como marca a tradición diante das escaleiras do Capitolio senón dentro debido ás xélidas temperaturas que se rexistran en Washinton. Están convidadas 600 persoas, incluídos os expresidentes do país e varios mandatarios estranxeiros como o presidente da Arxentina ou a primeira ministra italiana.

Todos serán testemuñas de como Donald Trump xura lealdade á Constitución este luns 20 de xaneiro, oito anos despois da súa primeira investidura como presidente e catro desde o asalto ao Capitolio, cando perdeu as eleccións fronte a Biden. Despois pronunciará un discurso onde anunciará algunhas das súas primeiras medidas. 

O centro de Washington está blindado. 25.000 axentes e as tecnoloxías de ultima xeración conforman o dispositivo de seguridade. A policía intentará que non haxa incidentes durante os actos da toma de posesión e nas manifestacións previstas na capital.