Unzué no 'txupinazo' de San Fermín: "Polos sanitarios e os enfermos de ELA"

O exfutbolista Juan Carlos Unzué prendeu este mediodía o foguete anunciador dos Sanfermíns 2022, os máis esperados tras dous anos de pandemia, que uniron ao seu carácter festivo unha mensaxe solidaria dirixida aos sanitarios e a quen padece esclerose lateral amiotrófica (ELA).

"Pamploneses, iruindarrak. Este txupinazo vai dedicado a todos e todas os sanitarios e as persoas que nos axudaron en toda a pandemia e a todos os enfermos con ELA". Con estas palabras e un "viva San Fermín, gora San Fermín", Unzué lanzou o txupinazo.

Nin a choiva que estivo caendo nas últimas horas nin o incremento da circulación da covid-19 en Navarra puideron coas ganas de festa visibles nunha Praza Consistorial ateigada e nos arredores da zona vella, onde se viviu con emoción o inicio de 204 horas ininterrompidas de festa, do 6 ao 14 de xullo.

Tras as suspensións de 2020 e 2021 por mor da pandemia, estes foron considerados como os Sanfermíns máis esperados da historia e confíase en que sexan, á súa vez, "os mellores", para o que o concello programou 532 actos.