Última xornada para pedir o voto por correo nas eleccións do 28M

O prazo para solicitar o voto por correo para as eleccións autonómicas e municipais do 28M termina este xoves, 18 de maio, último día establecido para presentar o impreso de solicitude tanto vía telemática na páxina de Correos como de forma presencial nunha oficina.

Para poder votar por correo é necesario estar rexistrado no censo de españois residentes en España, CER, ou no de españois residentes-ausentes que viven no estranxeiro,CERA.

O voto por correo pódese pedir vía telemática na web do Correos, identificándose cos certificados de persoa física recoñecidos polo Ministerio de Industria e o DNI electrónico, ou nas súas oficinas, onde se debe realizar persoalmente por cada elector salvo en caso de enfermidade ou discapacidade.

Unha vez realizada a solicitude, o elector recibirá no seu domicilio un sobre coas papeletas de cada formación política, o certificado de inscrición no censo e outro sobre coa dirección da Mesa onde lle corresponde votar.

Escollida a papeleta e introducida no sobre correspondente, pecharao para metelo no outro sobre dirixido á Mesa electoral, onde ademais incluirá o certificado de inscrición no censo.

O voto debe ser remitido por vía certificada non máis tarde do 24 de maio. Os españois que viven no estranxeiro teñen de prazo entre o 20 e o 25 maio se votan nas urnas habilitadas nos seus países ou ata o 23 de maio se o fan por correo certificado.

Correos reforzou as súas oficinas no último día habilitado para solicitar o voto por correo coa apertura de forma extraordinaria de 13 oficinas en 7 municipios que celebran este xoves, 18 de maio, festivos locais.

Esta apertura extraordinaria será ata as 14 horas e realízase nos concellos Santiago de Compostela, Ames e Teo; de Ortuella en Biscaia;; Jarandilla de la Vera, en Cáceres; e El Molar e Xetafe na Comunidad de Madrid.

Correos asinou ademais 2.500 contratos de reforzo para axilizar a atención nas oficinas e nas reparticións.