Últimos preparativos para o Petardazo e o Fareleiro do Entroido de Xinzo
O Fareleiro é unha das citas máis tradicionais do Entroido limián e choca nese sentido co Petardazo, que ten pouco máis dunha década de percorrido
A veciñanza non pode máis coas súas ganas de iniciar cos días de Entroido
Este sábado, a veciñanza de Xinzo de Limia comezará o seu ciclo entroideiro, o máis longo de toda Europa. Todo iniciará co sábado de Petardazo e o Domingo Fareleiro. A vila leva semanas preparándose para este acontecemento que, en palabras dos veciños, é o máis importante de todo o ano.
As 12 da noite do sábado a domingo será xa Entroido en Xinzo e desde a Asociación A Pantalla están a rematar os últimos detalles para este fin de semana, como cargar no carro os sacos cos máis de 400 quilogramos de farelos cos que se enchouparán as rúas da vila no domingo.
"A toda esta fariña hai que sumar o que traerán os veciños, que multiplica varias veces a nosa cantidade", explica Adriana Jiménez, membro da Asociación A Pantalla.
O Fareleiro é unha das citas máis tradicionais do Entroido limián e choca nese sentido co Petardazo, que ten pouco máis dunha década de percorrido. Así e todo, o Fareleiro tampouco se festexa coma antes.
"Cando eu era pequeno ía ao cole cos petos cheos de fariña para tirarlla as rapazas", relata Suso Fariñas, membro tamén da Asociación A Pantalla. "Era o que se coñecía como 'dar as fareladas' e era unha broma que se empregaba durante todo o Entroido".
Agora o Fareleiro está concentrado nun único día, o primeiro domingo de Entroido. Como recomendación, tentar evitar tirar fariña aos ollos, mais todas as outras falcatruadas están permitidas nesta liorta de fariña.
"Son datas que estamos esperando todo o ano", afirma Suso. A veciñanza non pode máis coas súas ganas de iniciar cos días de Entroido. Ao final, eles contan os anos cos Entroidos nos que troulean.
