Un ataque israelí contra unha escola da ONU en Gaza deixa máis de 40 mortos e ducias de feridos
Un ataque israelí contra unha escola da ONU en Gaza deixa máis de 40 mortos e ducias de feridos
Israel asegura que na escola se agochaban "entre 20 e 30 terroristas" de Hamas e da Xihad Islámica
O masacre perpetrouse de madrugada, mentres a xente durmía
![(REUTERS / Doaa Rouqa)](https://img-g24-crtvg.flumotion.com/prog24/2024/20240606/2024-06-06T090651Z_867477445_RC2J58A3M4N8_RTRMADP_3_ISRAEL-PALESTINIANS_REUTERSDoaaRouqa.png)
Polo menos 40 gazatís morreron en ataques israelís sobre o campamento de refuxiados de Nuseirat, no centro da Franxa de Gaza, a maioría deles nunha escola da Axencia da ONU para os Refuxiados Palestinos (UNRWA) que albergaba máis de 500 desprazados.
"O exército de ocupación matou a 40 desprazados no masacre de Nuseirat, entre eles 14 nenos e 9 mulleres, e feriu a outras 74 persoas, entre elas 23 nenos e 18 mulleres", informou o Goberno da Franxa de Gaza, controlado por Hamas.
O Exército israelí confirmou o ataque e indicou que a escola tiña integrado un complexo do grupo islamita, onde había "terroristas que participaron no ataque asasino contra comunidades do sur de Israel o 7 de outubro, que foron eliminados".
Nela escondíanse "entre 20 e 30 terroristas de Hamas e da Xihad Islámica", que utilizaban o complexo como "base de operacións avanzadas para lanzar ataques contra as forzas israelís", aclarou aos medios o portavoz do Exército, Peter Lerner.
Lerner indicou que se trata do quinto caso no último mes -o segundo só esta semana- no que o Exército identifica a "operativos terroristas" en escolas con bandeiras da UNRWA, entidade que está no punto de mira de Israel acusada de ter vínculos con Hamas.
O Goberno gazatí, controlado por Hamas, asegurou, con todo, que moitas das vítimas eran civís e cualificou o ataque de "horrible masacre", aínda que Israel sostivo que se "tomaron medidas para reducir o risco de danar a civís non involucrados" e que se cancelou o ataque ata en dúas ocasións nos últimos días por ese motivo.
O Goberno de Hamas asegurou que o Exército lanzou polo menos tres mísiles á escola, onde había máis de 500 persoas refuxiadas durmindo sobre as 2 da madrugada, e indicou que se trata do ataque israelí 149 contra desprazados.
"A ocupación cometeu repetidamente estes masacres de maneira brutal", sinalou. Segundo o Exército, no recinto operaban efectivos das forzas Nukhba, a unidade de elite de Hamas, cuxos axentes participaron no ataque en Israel do 7 de outubro, que deixou uns 1.200 mortos e 250 secuestrados.
"Que se escondan en escolas da UNRWA non nos disuadirá de operar contra Hamas, a Yihad Islámica, e todos aqueles que levaron a cabo as atrocidades do 7 de outubro. Non terán un refuxio seguro onde esconderse", subliñou o portavoz.
En xaneiro Israel acusou a unha decena de traballadores da UNRWA de participar nos ataques do 7 de outubro e logo aseverou que máis de 200 dos seus empregados teñen vínculos cos islamitas; e mesmo está pendente de aprobación na Knéset (Parlamento israelí) unha lei para declarar á organización humanitaria, que opera nos territorios palestinos desde 1948, como organización terrorista.