Un beduíno secuestrado o 7 de outubro foi liberado de Gaza polo Exército israelí

O Exército israelí rescatou este martes o refén Kaid Farhan al-Qadi, un beduíno de 52 anos, no sur da Franxa de Gaza, onde permanecía secuestrado por Hamas desde o pasado 7 de outubro, informou un comunicado castrense.

"O seu estado de saúde é estable e está a ser trasladado ao hospital para facerlle máis probas médicas", aseguraron as forzas armadas, que xa informaron á súa familia do rescate.

Dos 251 secuestrados o 7 de outubro, quedan en Gaza 104 presos, 34 deles mortos. Tamén hai outros catro reféns desde hai anos, dous deles soldados mortos.

A "complexa operación", segundo as forzas armadas, foi levada a cabo da man da axencia de intelixencia interior de Israel, o Shin Bet, e permitiu sacar tras a al-Qadi tras 326 días de cativerio na Franxa.

"Non poden publicarse máis detalles por consideracións sobre a seguridade dos nosos reféns, a das nosas forzas e a seguridade nacional", engadiu o comunicado castrense.

Al-Qadi foi secuestrado no kibutz -comunidade agraria- de Magen, a uns 5 quilómetros da fronteira con Gaza, cando estaba a traballar nunha fábrica de embalaxe.

"Estamos a facer todo o posible para salvar todos os secuestrados", dixo nun comunicado o xefe do Estado Maior do Exército, Herzi Halevi.

Al Qadi reunido cos seus seres queridos no hospital (Government Press Office/Yossi If)

O Foro das Familias dos Reféns, a principal plataforma que representa os familiares dos secuestrados o 7 de outubro, celebrou o rescate, pero deixou claro que o resto de reféns que aínda quedan en Gaza necesitan un acordo de cesamento do fogo para poder saír.

"Pedimos urxentemente á comunidade internacional manter a presión sobre Hamas para aceptar a proposta de acordo", dixo o grupo.

No seu ataque do 7 de outubro contra Israel Hamas lanzou uns 3.000 foguetes cara a territorio israelí e infiltrou uns mil milicianos que masacraron unhas 1.200 persoas e secuestraron outras 251 nas poboacións próximas á Franxa de Gaza

O ataque deixou en total 19 beduínos mortos e seis secuestrados

Entre os beduínos que perderon a vida, doce morreron a mans dos milicianos e outros sete -entre eles seis nenos- pereceron cando os foguetes impactaron nas súas comunidades -Al Bat e Arara-, no deserto do sur de Israel. 

Al Bat, do mesmo xeito que outras 36 comunidades beduínas non recoñecidas por Israel e onde viven unhas 80.000 persoas, non existe no mapa oficial e polo tanto non conta coa protección do sistema de defensa antiaéreo que si protexe ao resto das poboacións do país.

Israel busca que os máis de 300.0000 beduínos -árabes musulmáns seminómades- que viven no seu territorio desde hai centos de anos, moito antes do establecemento do Estado en 1948, renuncien ao seu estilo de vida agrícola para habitar reducidas e empobrecidas zonas urbanas que lles concedeu. Uns 192.000 beduínos xa o fixeron.