Un camioneiro choca varias veces contra un turismo e intenta botalo da estrada

Ocorreu a finais de decembro en Mesía, pero a noticia coñeceuse agora. Un camioneiro pegouse a un coche, bateu contra o vehículo e intentou botalos da estrada. Os ocupantes do turismo conseguiron gravalo co seu teléfono a pesar de ir aterrorizados. Finalmente, foi detido en Vilalba.

O accidente produciuse o pasado 29 de decembro de 2024 na estrada N-634, á altura de Mesía, pero a súa divulgación produciuse esta semana pola publicación de vídeos en redes sociais telemáticas.

Existen diferentes gravacións desde varios puntos de vista, que cronoloxicamente empezan coa do propio camión, ás 17:35 horas daquela tarde.

Mentres o coche no que viaxaba a familia posteriormente acosada, con dous menores, adiantaba, o condutor invadiu o carril contrario, supostamente para dificultar a manobra.

No vídeo vese aparecer o coche coa familia e un portabicicletas detrás pola beiravía e completar o adiantamento antes de que chegase outro coche de fronte.

A partir de aí, nos vídeos que se gravaron desde o interior do coche, vese unha persecución ata que o camión chegar a impactar. Escóitanse a bucina do camión e os berros da familia, cos que os fillos piden á súa nai que acelere para evitar novas colisións.

O pai alertou a continuación á Garda Civil con todos os datos e logo o camión deu un forte acelerón para superar ao coche.

Os axentes detiveron en Vilalba ao camioneiro, que se atopa baixo investigación xudicial por un suposto delito contra a seguridade viaria.

Case dous meses despois, a familia que ía no coche aínda ten o susto no corpo.