Un detido en Vigo pola súa presunta relacion cunha vaga de roubos en Valencia

Á primeira hora da tarde en pleno centro de Vigo varias patrullas da Policía Local e da Policía Nacional deron o alto a un vehículo en que viaxaban un home e dúas mulleres. Os axentes procederon primeiro ao rexistro do coche. Unha inspección moi exhaustiva e en presenza do condutor, a quen despois cachearon.

Tamén o fixeron coas dúas mulleres que o acompañaban no interior do portal dun edificio próximo. A situación causou grande expectación entre veciños e peóns, que non sabían que estaba a acontecer.

A operación policial prolongouse na Gran Vía viguesa durante unha hora, xa que a comunicación cos tres ocupantes do vehículo, de nacionalidade croata, non foi doada.

Os axentes detivéronos ao comprobar que a matrícula do coche en que viaxaban coincidía cunha busca e captura relacionada coa autoría dunha vaga de roubos de xoias e de diñeiro en diferentes vivendas na zona do Levante. 

No rexistro do coche os axentes non atoparon as ferramentas que, supostamente, empregarían para cometer estes roubos. Porén, a policía confirmou que viaxaban con documentación falsa e investiga se preparaban outros asaltos en Galicia. Finalmente procederon á detención do condutor, de 21 anos. As dúas mulleres que o acompañaban, de dezaoito anos, quedaron en liberdade.