Un incendio calcina por completo un restaurante e as instalacións do club deportivo de Moaña
Un incendio calcina por completo un restaurante e as instalacións do club deportivo de Moaña
Dous turismos que estaban nas inmediacións víronse tamén afectados polas lapas, do mesmo xeito que algúns dos barcos atracados no embarcadoiro
Un voraz incendio na madrugada deste venres en Moaña calcinou por completo as instalacións do restaurante La Bathia e afectou tamén as oficinas do club deportivo. O incendio comezou minutos despois das dúas da mañá.
O incendio, do que de momento se descoñecen as causas, produciuse sobre as dúas da madrugada, segundo fontes do 112, servizo que a esa hora recibiu unha chamada da Policía Local de Moaña para que puxese en marcha un amplo dispositivo.
Nel participaron os Bombeiros do Porriño e os de Ribadumia, así como os equipos GES de Mos, aínda que non os do Morrazo, pois o parque estaba pechado por falta de efectivos, mentres que os de Vigo, que non se chegaron a desprazar, colaboraron co envío dunha motobomba.
O lume foi finalmente sufocado ás cinco da mañá. Non hai feridos, pero os danos materiais son moi importantes. Estragaron por completo a zona de servizos do club deportivo, vestiarios, oficinas e o propio restaurante. Dous turismos que estaban nas inmediacións víronse tamén afectados polas lapas, do mesmo xeito que algúns dos barcos atracados no embarcadoiro. Estase investigando a orixe do incendio.
