Un incendio calcina unha cafetería e un salón de peiteado en Ordes

Un incendio iniciado na noite deste mércores calcinou por completo dous locais comerciais anexos, unha cafetería e un salón de peiteado, no baixo dun edificio en Ordes. Con todo, non houbo que lamentar danos persoais.

Foi un particular quen alertaba ao 112 Galicia pouco antes das 21:00 horas para avisar de que saía fume pola fachada dun edificio situado na esquina de rúa Mediodía con Víctor González Falla.

De inmediato, o 112 Galicia solicitou a intervención dos bombeiros de Ordes, da Garda Civil e da Policía Local.

Os equipos de extinción traballaron durante varias horas para controlar o lume, tras o que se uniu unha dotación dos bombeiros de Betanzos.

Pouco despois das 3:00 horas da madrugada, co lume xa apagado, continuaban as tarefas de arrefriamento.